सोलापूर : सोलापूर स्थानिक स्वराज्य संस्था मतदारसंघाच्या विधानपरिषद निवडणुकीसाठी महायुतीकडून माजी आमदार राजेंद्र राऊत यांनी सोमवारी मोठ्या शक्तिप्रदर्शनात उमेदवारी अर्ज दाखल केला. पंतप्रधान नरेंद्र मोदीआणि मुख्यमंत्री देवेंद्र फडणवीस यांच्या नेतृत्वाखाली भारतीय जनता पक्ष, शिवसेना आणि राष्ट्रवादी काँग्रेस महायुतीच्या वतीने हा अर्ज दाखल करण्यात आला.उमेदवारी अर्ज दाखल करताना पालकमंत्री केकवर गोरे , खासदार ज्योती वाघमारे, आमदार विजयकुमार देशमुख, आमदार बाबासाहेब देशमुख यांच्यासह महायुतीतील अनेक प्रमुख नेते व पदाधिकारी उपस्थित होते.
अर्ज दाखल करण्याच्या वेळी समर्थक व कार्यकर्त्यांची मोठी गर्दी दिसून आली असून, शहरात राजकीय वातावरण चांगलेच तापल्याचे चित्र पाहायला मिळाले.यावेळी बोलताना राजेंद्र राऊत यांनी भारतीय जनता पक्ष व वरिष्ठ नेतृत्वाने माझ्यावर दाखविलेला विश्वास मी निश्चितच सार्थ करून दाखवेन, अशी ग्वाही दिली. “माझ्यासारख्या सामान्य कार्यकर्त्याला पक्षाने संधी दिली, याबद्दल मी वरिष्ठ नेत्यांचा ऋणी असून ही जबाबदारी प्रामाणिकपणे पार पाडणार आहे,” असेही त्यांनी सांगितले.
या कार्यक्रमाला आमदार सचिन कल्याणशेट्टी, आमदार देवेंद्र कोठे, आमदार समाधान आवताडे, आमदार नारायण आबा पाटील, माजी आमदार राजन मालक पाटील, दिलीप माने, रामभाऊ सातपुते, शहाजी बापू पाटील, संजय मामा शिंदे, दीपक आबा साळुंखे यांच्यासह विविध राजकीय पक्षांचे पदाधिकारी, स्थानिक स्वराज्य संस्थांचे प्रतिनिधी आणि महायुतीचे शेकडो कार्यकर्ते उपस्थित होते.तसेच जिल्हा परिषद, महापालिका आणि विविध स्थानिक संस्थांतील पदाधिकारी, नगराध्यक्ष, सभापती आणि भाजप, शिवसेना व राष्ट्रवादी काँग्रेसच्या पदाधिकाऱ्यांची मोठ्या संख्येने उपस्थिती असल्याने उमेदवारी अर्ज दाखल कार्यक्रमाला राजकीय शक्तिप्रदर्शनाचे स्वरूप प्राप्त झाले.
