सोलापूर : लोकसहभागातून आरोग्य व्यवस्था अधिक सक्षम आणि नागरिकाभिमुख करण्याच्या उद्देशाने राज्य शासनाने स्थापन केलेल्या ‘एकात्मिक आरोग्यवर्धिनी समिती’च्या अध्यक्षपदाची जबाबदारी दीपक जमादार यांच्यावर सोपविण्यात आली असून, त्यांच्या नेतृत्वाखाली परिसरातील नागरिकांना अधिक सक्षम आरोग्य सुविधा मिळण्याची अपेक्षा व्यक्त होत आहे. विशेषतः जुळे सोलापूर परिसरातील विविध भागांतील नागरिकांसाठी ही नियुक्ती महत्त्वाची मानली जात आहे.सार्वजनिक आरोग्य व कुटुंब कल्याण विभागाच्या माध्यमातून स्थापन करण्यात आलेल्या या समितीचे उद्दिष्ट नागरी आरोग्य सेवा अधिक प्रभावी करणे, स्थानिक समस्यांवर तत्काळ उपाययोजना करणे आणि आरोग्य व्यवस्थेत नागरिकांचा सहभाग वाढविणे हे आहे.
यामध्ये नागरी प्राथमिक आरोग्य केंद्रांतील जनआरोग्य समिती तसेच रुग्णालयांतील रुग्ण कल्याण समितीच्या माध्यमातून स्वच्छता, पोषण, पिण्याच्या पाण्याची गुणवत्ता, रोगप्रतिबंधक उपाययोजना आणि जनजागृतीवर विशेष भर दिला जाणार आहे.समितीचे अध्यक्ष म्हणून दीपक जमादार हे नागरिक आणि प्रशासन यांच्यातील दुवा म्हणून काम पाहणार असून, जुळे सोलापूर, सैफुल परिसर, द्वारका नगर, उद्धव नगर, रोहिणी नगर भाग क्रमांक १, २ आणि ३ तसेच रत्नमंजिरी सोसायटी परिसरातील नागरिकांना आरोग्य विभागाच्या योजनांचा मोठा फायदा होण्याची अपेक्षा व्यक्त होत आहे. या भागांमध्ये आरोग्य शिबिरे, स्वच्छता उपक्रम, नागरिकांच्या तक्रारींचे निवारण, लसीकरण, महिलांचे व बालकांचे आरोग्य, रोगप्रतिबंधक उपाययोजना आणि प्राथमिक उपचार सुविधांना अधिक गती मिळू शकते, असे स्थानिकांकडून बोलले जात आहे.दीपक जमादार यांच्या नेतृत्वाखाली परिसरातील नागरिकांच्या आरोग्यविषयक अडचणी प्रशासनापर्यंत पोहोचवून त्यावर जलद कार्यवाही व्हावी, सरकारी आरोग्य सेवा सर्वसामान्यांपर्यंत पोहोचावी आणि नागरिकांना वेळेवर सुविधा मिळाव्यात यासाठी प्रयत्न होणार असल्याची अपेक्षा आहे.
लोकांशी थेट संपर्क आणि सामाजिक प्रश्नांबाबत संवेदनशील भूमिका यामुळे जमादार यांच्या अध्यक्षतेखाली समिती अधिक प्रभावीपणे काम करेल, असा विश्वास स्थानिक नागरिक व्यक्त करत आहेत.विशेष म्हणजे, परिसरातील दुर्लक्षित भागांमध्ये आरोग्य सुविधा पोहोचविणे, नागरिकांमध्ये आरोग्यविषयक जागरूकता निर्माण करणे आणि सरकारी योजनांचा प्रत्यक्ष लाभ गरजूंपर्यंत पोहोचवणे, हे या समितीसमोरील मोठे उद्दिष्ट राहणार आहे. त्यामुळे दीपक जमादार यांच्या नियुक्तीकडे जुळे सोलापूर परिसरात आशेच्या नजरेने पाहिले जात आहे.
