सोलापूर : दक्षिण सोलापूर पंचायत समितीच्या उपसभापती वर्षा सोमनाथ पटणे (उर्फ वर्षा शिवाजी कोनाळे) यांच्या इतर मागासवर्गीय (ओबीसी) प्रवर्गातील जात प्रमाणपत्रासंदर्भात महत्त्वाची घडामोड समोर आल्याने राजकीय व प्रशासकीय वर्तुळात खळबळ उडाली आहे. धाराशिव जिल्हा जात प्रमाणपत्र पडताळणी समितीने त्यांच्या सादर केलेल्या जात प्रमाणपत्राची पडताळणी करत ते अवैध असल्याचे नमूद केल्याची माहिती समोर आली असून, संबंधित प्रमाणपत्र रद्द करून जप्त करण्याबाबत कारवाईचे निर्देश दिल्याची चर्चा सुरू आहे.या प्रकरणाची सुरुवात होतगी स्टेशन परिसरातील सामाजिक कार्यकर्ते मिलिंद मुळे यांनी केलेल्या तक्रारीनंतर झाली असल्याचे सांगितले जाते.
तक्रारीनंतर जात प्रमाणपत्र पडताळणी समितीने प्रकरणाची सुनावणी घेत विविध शासकीय कागदपत्रे, अभिलेख तसेच उपलब्ध नोंदींची तपासणी केली. निवडणूक अर्जासोबत वर्षा शिवाजी कोनाळे (मूळ रा. फणेपूर, ता. उमरगा) यांनी राज्याच्या ओबीसी यादीतील अनुक्रमांक १९० वरील ‘वाणी’ जातीचे प्रमाणपत्र सादर केल्याची नोंद समितीसमोर होती.माहितीनुसार, या संदर्भात समितीने दोन वेळा सुनावणी निश्चित केली होती. मात्र, दोन्ही वेळा संबंधितांकडून उपस्थिती राहिली नसल्याची नोंद असल्याचे समजते. त्यामुळे उपलब्ध कागदपत्रांच्या आधारे समितीने पुढील प्रक्रिया सुरू ठेवली.तपासादरम्यान प्रमाणपत्रावरील डिजिटल स्वाक्षरी, कार्यालयीन शिक्का तसेच इतर तांत्रिक बाबींची पडताळणी करण्यात आली.
संबंधित उपविभागीय अधिकाऱ्यांनी हे प्रमाणपत्र त्यांच्या कार्यालयातून निर्गमित झाले नसल्याचे लेखी स्वरूपात कळविल्याची माहिती पुढे आली आहे. तसेच प्रमाणपत्रावरील बारकोड तपासणीत संबंधित माहिती उपलब्ध होत नसल्याची बाबही निदर्शनास आल्याचे सांगितले जात आहे. या सर्व बाबींच्या आधारे समितीने संबंधित प्रमाणपत्राबाबत निर्णय घेतल्याचे समजते.विशेष म्हणजे, बोरामणी पंचायत समिती गणातून झालेल्या निवडणुकीत वर्षा पटणे यांनी २ हजार १४३ मतांच्या फरकाने विजय मिळवला होता. त्यांना ६ हजार ३०७ मते मिळाली होती, तर प्रतिस्पर्धी उमेदवारांना ४ हजार १६४ मते मिळाली होती. विजयानंतर त्यांची पंचायत समितीच्या उपसभापतीपदी निवड झाली होती. आता या प्रकरणामुळे त्यांच्या राजकीय भवितव्याबाबत तसेच पुढील प्रशासकीय कारवाईकडे सर्वांचे लक्ष लागले आहे.
