११ जुलैला जिल्हा नियोजन समितीची बैठक

सोलापूर : सोलापूर जिल्हा नियोजन समितीची महत्त्वपूर्ण बैठक ग्रामविकास व पंचायतराज मंत्री तथा जिल्ह्याचे पालकमंत्री जयकुमार गोरे यांच्या अध्यक्षतेखाली शनिवार, ११ जुलै रोजी सकाळी ११ वाजता नियोजन भवन येथील जिल्हा नियोजन समिती सभागृहात होणार आहे. बैठकीत जिल्हा वार्षिक योजनेच्या खर्चाचा आढावा तसेच आगामी वर्षाच्या प्रारूप आराखड्यावर निर्णय घेतला जाणार आहे.जिल्हाधिकारी तथा समितीचे सदस्य सचिव कार्तिकेयन एस. यांनी यासंदर्भातील परिपत्रक जारी केले आहे.

बैठकीत मागील बैठकीच्या इतिवृत्तास व त्यावरील कार्यवाही अहवालास मंजुरी दिली जाणार आहे.तसेच जिल्हा वार्षिक योजना २०२५-२६ अंतर्गत सर्वसाधारण, अनुसूचित जाती उपयोजना आणि आदिवासी क्षेत्राबाहेरील उपयोजनांच्या ३१ मार्च २०२६ अखेरच्या खर्चास मान्यता देण्यात येणार आहे. याशिवाय सन २०२६-२७ च्या जिल्हा वार्षिक योजनेच्या प्रारूप आराखड्यावर चर्चा करून मंजुरी दिली जाणार असून अध्यक्षांच्या परवानगीने आयत्यावेळचे विषयही सभेत मांडले जाणार आहेत.बैठकीस सर्व संबंधित विभागप्रमुखांनी संपूर्ण माहितीसह स्वतः उपस्थित राहावे, प्रतिनिधी पाठवू नयेत, असे स्पष्ट निर्देश जिल्हाधिकारी कार्तिकेयन एस. यांनी दिले आहेत.