सोलापूर : बनावट दिव्यांग प्रमाणपत्र मिळवून त्याच्या आधारे सरकारी नोकरी मिळवून शासनाची फसवणूक केल्याप्रकरणी सोलापूरातील सदर बझार पोलिस ठाण्यात रुग्णालयातील एका कर्मचाऱ्याविरुद्ध गुन्हा दाखल करण्यात आला आहे.याप्रकरणी डॉ. ऋत्विक देविदास जयकर (वय ५४), अधिष्ठाता, श्री छत्रपती शिवाजी महाराज सर्वोपचार रुग्णालय, सोलापूर यांनी फिर्याद दिली आहे.
त्यानुसार राजेश भाऊसाहेब जाधव (रा. नळेगाव, व्हीसीटी नगर, अहमदनगर, सध्या कार्यरत – श्री छत्रपती शिवाजी महाराज सर्वोपचार रुग्णालय, सोलापूर) याच्याविरुद्ध भारतीय न्याय संहिता कलम ३१८(४), ३३६(३), ३४०(२), २३२ व २३५ अन्वये गुन्हा दाखल करण्यात आला आहे.पोलिसांनी दिलेल्या माहितीनुसार, आरोपीने यापूर्वी अहमदनगर येथील जिल्हा शल्य चिकित्सक कार्यालयात दिव्यांग प्रमाणपत्रासाठी अर्ज केला होता. मात्र तपासणीत तो अपात्र ठरल्याने त्याचा अर्ज नाकारण्यात आला होता. त्यानंतर आरोपीने यूडीआयडीच्या ऑनलाइन प्रक्रियेद्वारे बनावट पत्ता व बनावट आधार कार्डाचा वापर करून अर्ज सादर केल्याचा आरोप आहे.
तसेच आवश्यक वैद्यकीय तपासणी न करता ४५ टक्के अपंगत्वाचे बनावट दिव्यांग प्रमाणपत्र बेकायदेशीररित्या मिळवून ते खरे असल्याचा भास निर्माण केला. याच प्रमाणपत्राच्या आधारे अहमदनगर येथील पाटबंधारे विभागात सादर करून सरकारी नोकरी मिळवत शासनाची फसवणूक केल्याचे फिर्यादीत नमूद करण्यात आले आहे. या प्रकरणाचा पुढील तपास पोलीस नाईक लकडे करीत आहेत.
