सोलापूर :सोलापूर महानगरपालिकेतील २४९ रोजंदारी सेवकांना कायम करणे, १५ वाहनचालकांना नियमित सेवेत समाविष्ट करणे, जुनी पेन्शन योजना, थकीत महागाई भत्ता आणि विविध प्रलंबित कर्मचारी प्रश्नांबाबत सोमवारी महापौर कार्यालयात सविस्तर आढावा बैठक पार पडली. महापौर विनायक कोंड्याल यांच्या अध्यक्षतेखाली झालेल्या बैठकीत विविध मागण्यांबाबत शासनाकडे प्रस्ताव सादर करून पाठपुरावा करण्याचा निर्णय घेण्यात आला.
मुख्यमंत्री देवेंद्र फडणवीस यांच्या अध्यक्षतेखाली मंत्रालयात झालेल्या बैठकीनंतर तसेच पालकमंत्री जयकुमार गोरे आणि आमदार देवेंद्र कोठे यांच्या पाठपुराव्याच्या पार्श्वभूमीवर ही बैठक घेण्यात आली. बैठकीत कोल्हापूर व नागपूर महानगरपालिकेच्या धर्तीवर २४९ रोजंदारी सेवकांना कायम करण्यासाठी शासनाकडे प्रस्ताव पाठविण्याबाबत चर्चा झाली. तसेच या कर्मचाऱ्यांना जुनी पेन्शन योजना लागू करण्यासाठी आवश्यक प्रस्ताव तातडीने सादर करण्यावर भर देण्यात आला.याशिवाय १५ वाहनचालकांना कायम सेवेत समाविष्ट करणे, कर्मचाऱ्यांचा थकीत महागाई भत्ता, लाड-पागे सेवक, अनुकंपा नियुक्ती, रोजंदारी वाहनचालक, आरसीएच, लिंक वर्कर, आशा सेविका, नर्सेस, एएनएम, पीएचएन, जीएनएम, बालवाडी सेविका, परिवहन विभाग, शहर क्षयरोग केंद्र, घनकचरा व्यवस्थापन विभाग तसेच वर्ग-४ कर्मचाऱ्यांच्या विविध प्रलंबित प्रश्नांचाही आढावा घेण्यात आला.सुधारित आकृतिबंध, सेवानिवृत्त कर्मचाऱ्यांचे निवृत्तीवेतन व आर्थिक लाभ, डॉक्टरांच्या पदनिर्मिती, मयत कर्मचाऱ्यांच्या वारसांना अनुकंपा नियुक्ती, वर्ग-४ कर्मचाऱ्यांना आश्वासित प्रगती योजनेचा लाभ आणि सरळसेवा भरती या विषयांवरही सविस्तर चर्चा झाली.
संबंधित विभागांनी आवश्यक माहिती व प्रस्ताव तातडीने शासनाकडे पाठवावेत, असे निर्देश महापौर विनायक कोंड्याल यांनी अधिकाऱ्यांना दिले.बैठकीस उपमहापौर ज्ञानेश्वरी देवकर, स्थायी समिती सभापती रंजीता चाकोते, सभागृह नेते नरेंद्र काळे, शहराध्यक्ष रोहिणी तडवळकर, आयुक्त डॉ. सचिन ओम्बासे, मुख्यलेखा अधिकारी रत्नराज जवळगेकर, उपायुक्त सोनाली यादव, गिरीश पंडित यांच्यासह विविध विभागांचे अधिकारी आणि कामगार संघटनांचे प्रतिनिधी उपस्थित होते.
