‘न्याय हवा, आश्वासन नको!’ अंगणवाडी कर्मचाऱ्यांचा आक्रमक मोर्चा

सोलापूर : विविध प्रलंबित मागण्यांकडे शासनाचे लक्ष वेधण्यासाठी महाराष्ट्र राज्य अंगणवाडी कर्मचारी संघाच्या वतीने मंगळवारी जिल्हा परिषद कार्यालयावर भव्य मोर्चा काढण्यात आला. जिल्हाभरातून आलेल्या अंगणवाडी सेविका व मदतनीसांनी घोषणाबाजी करत आपल्या मागण्यांसाठी आवाज बुलंद केला. त्यानंतर संघटनेच्या शिष्टमंडळाने मुख्य कार्यकारी अधिकाऱ्यांची भेट घेऊन निवेदन सादर केले. मोर्चामध्ये शासकीय कर्मचाऱ्यांचा दर्जा, सर्वोच्च न्यायालयाच्या निर्णयानुसार ग्रॅच्युइटीची अंमलबजावणी, पेन्शन योजना लागू करणे, प्रोत्साहन भत्त्यात वाढ, मानधन व इतर प्रलंबित देयके वेळेत अदा करणे, तसेच पदोन्नतीची प्रक्रिया गतीने राबविणे अशा प्रमुख मागण्या करण्यात आल्या.

संघटनेच्या पदाधिकाऱ्यांनी सांगितले की, अंगणवाडी कर्मचारी बालकांचे पोषण, गर्भवती व स्तनदा मातांची सेवा, पूर्वप्राथमिक शिक्षण आणि शासनाच्या विविध कल्याणकारी योजनांची प्रभावी अंमलबजावणी करत आहेत. मात्र, अनेक वर्षांपासून त्यांच्या न्याय्य मागण्या प्रलंबितच राहिल्या असून त्याबाबत शासनाने अद्याप ठोस निर्णय घेतलेला नाही. निवेदनाद्वारे शासनाने या सर्व मागण्यांवर तातडीने सकारात्मक निर्णय घ्यावा, अन्यथा राज्यव्यापी आंदोलन अधिक तीव्र करण्याचा इशारा संघटनेने दिला. मोर्चात जिल्ह्यातील विविध तालुक्यांतील अंगणवाडी सेविका आणि मदतनीस मोठ्या संख्येने सहभागी झाल्या होत्या.