सोलापूर : पद्मशाली समाजाचे कुलदैवत श्री मार्कंडेय महामुनी यांच्या रथोत्सवाची भव्य मिरवणूक यंदा सुरक्षित, शिस्तबद्ध आणि निर्विघ्न पार पडावी, यासाठी सोलापूर महानगरपालिका प्रशासनाने कंबर कसली आहे. मिरवणूक मार्गावरील खड्डे, अडथळे, वाढलेल्या झाडांच्या फांद्या, ड्रेनेज तसेच विद्युत व्यवस्थेच्या प्रश्नांवर तातडीने उपाययोजना करण्याचे निर्देश महापौर विनायक कोंड्याल यांनी संबंधित अधिकाऱ्यांना दिले.
रथोत्सवाच्या पार्श्वभूमीवर महापौर कार्यालयात आयोजित बैठकीत मिरवणुकीच्या संपूर्ण मार्गाचा नागरी सुविधा आणि सुरक्षेच्या दृष्टीने आढावा घेण्यात आला. मोठ्या संख्येने भाविक आणि नागरिक मिरवणुकीत सहभागी होत असल्याने कोणत्याही ठिकाणी गैरसोय किंवा अडथळा निर्माण होऊ नये, यासाठी सर्व विभागांनी समन्वयाने काम करण्याच्या सूचना देण्यात आल्या. पद्मशाली संस्थेचे अध्यक्ष सुरेश फलमारी यांनी मिरवणुकीच्या नियोजनाची सविस्तर माहिती प्रशासनास दिली. मार्गावरील रस्त्यांची दुरुस्ती, खड्डे बुजविणे, वाहतुकीला अडथळा ठरणारे साहित्य हटविणे, झाडांच्या फांद्यांची छाटणी, ड्रेनेजची आवश्यक कामे तसेच विद्युत आणि अग्निशमन विभागाशी संबंधित उपाययोजनांकडे त्यांनी प्रशासनाचे लक्ष वेधले. रथोत्सवाच्या दिवशी गर्दीचा मोठा ताण येण्याची शक्यता लक्षात घेता रस्ते, स्वच्छता, ड्रेनेज, विद्युत व्यवस्था, अग्निशमन यंत्रणा आणि वाहतूक नियोजन यांचा एकत्रित आढावा घेण्यात आला. महापौरांनी संबंधित अधिकाऱ्यांना केवळ कागदोपत्री नियोजन न करता मिरवणूक मार्गाची प्रत्यक्ष पाहणी करून प्रलंबित कामे तातडीने पूर्ण करण्याचे निर्देश दिले.
“श्री मार्कंडेय महामुनी रथोत्सव हा पद्मशाली समाजाच्या श्रद्धेचा आणि सोलापूरच्या सांस्कृतिक परंपरेचा महत्त्वाचा भाग आहे. मिरवणूक सुरळीत आणि सुरक्षित वातावरणात पार पाडण्यासाठी महानगरपालिका प्रशासन पूर्णपणे सज्ज आहे. आवश्यक नागरी सुविधा वेळेत उपलब्ध करून दिल्या जातील,” असे महापौर विनायक कोंड्याल यांनी स्पष्ट केले.
रथोत्सवाच्या तयारीत रस्ते विभागाबरोबरच विद्युत, अग्निशमन, स्वच्छता आणि ड्रेनेज विभागाने परस्पर समन्वय ठेवण्यावर बैठकीत विशेष भर देण्यात आला. मिरवणुकीच्या मार्गावर अडथळा ठरणाऱ्या बाबी आधीच दूर करून नागरिकांना सुरक्षित मार्ग उपलब्ध करून देण्याचे निर्देश देण्यात आले आहेत.
बैठकीस उपमहापौर ज्ञानेश्वरी देवकर, सभागृह नेते नरेंद्र काळे, स्थायी समिती सभापती रंजीता चाकोते, शहराध्यक्ष तथा नगरसेविका रोहिणी तडवळकर, माजी महापौर कांचना यन्नम, अतिरिक्त आयुक्त संदीप कारंजे, नगर अभियंता नीलकंठ मठपती यांच्यासह महापालिकेचे अधिकारी आणि पद्मशाली समाजाचे पदाधिकारी उपस्थित होते. रथोत्सवाच्या पार्श्वभूमीवर झालेल्या या बैठकीमुळे मिरवणुकीच्या तयारीला वेग आला असून, रस्त्यांपासून सुरक्षेपर्यंत प्रत्येक व्यवस्था सज्ज ठेवण्याचे आव्हान महापालिका प्रशासनासमोर आहे.
