झोळांच्या अडचणी वाढल्या; अटकपूर्व जामीन फेटाळला

सोलापूर ; करमाळा, (वा.) भोंदू मनोहर भोसले याच्याशी कथित आर्थिक हितसंबंध असल्याचा आरोप आणि त्याच्या कथित अवैध पैशांची विल्हेवाट लावल्याच्या प्रकरणात दत्तकला शिक्षण संस्थेचे संस्थापक अध्यक्ष प्रा. रामदास झोळ यांचा अटकपूर्व जामीन बार्शी न्यायालयाने फेटाळला आहे. त्यामुळे झोळ यांच्या अडचणी वाढल्या असून ते अद्याप फरार असल्याचे पोलिसांकडून सांगण्यात आले. या प्रकरणात प्रा. रामदास झोळ आणि त्यांच्या पत्नी माया झोळ यांच्यासह दत्तकला शिक्षण संस्थेतील कर्मचारी राजेंद्र हुंबे व लक्ष्मीकांत लिगाडे यांच्यावर गुन्हा दाखल करण्यात आला आहे. माया झोळ यांना पोलिसांनी अटक केली आहे. पोलिस तपासात मनोहर भोसले याच्या पैशांची कथित विल्हेवाट लावण्यात सहभाग असल्याचे निष्पन्न झाल्याचा पोलिसांचा दावा आहे.

संस्थेची तीन यंत्रणांकडून चौकशी
या प्रकरणाची व्याप्ती वाढली असून दत्तकला शिक्षण संस्थेची धर्मादाय आयुक्त, शिक्षण विभाग आणि आयकर विभाग या तीन यंत्रणांकडून चौकशी सुरू असल्याची माहिती समोर आली आहे. त्यामुळे संस्थेच्या आर्थिक व्यवहारांसह अन्य बाबीही तपासाच्या कक्षेत आल्या आहेत.

तिघांना न्यायालयीन कोठडी
मनोहर भोसले याच्या पैशांची विल्हेवाट लावल्याच्या आरोपावरून राजेंद्र हुंबे, लक्ष्मीकांत लिगाडे आणि माया झोळ यांना अटक करण्यात आली होती. तिघांना माढा न्यायालयाने २१ ऑगस्टपर्यंत पोलिस कोठडी सुनावली होती. त्यानंतर शुक्रवारी न्यायालयाने तिघांची १४ दिवसांच्या न्यायालयीन कोठडीत रवानगी केली.दरम्यान, प्रा. रामदास झोळ यांचा अटकपूर्व जामीन अर्ज बार्शी न्यायालयाने फेटाळल्याने आता पोलिसांकडून त्यांच्या शोधासाठी हालचाली वाढण्याची शक्यता आहे.