सोलापूर : सोलापूर जिल्ह्यातील सुमारे ११ हजार माध्यमिक शिक्षक व शिक्षकेतर कर्मचाऱ्यांची तब्बल ८० कोटी रुपयांची विविध देयकांची बिले प्रलंबित असल्याने शिक्षकांमध्ये नाराजीचे वातावरण आहे. वेतन, भविष्य निर्वाह निधी (जीपीएफ), निवृत्तीवेतन, सेवा पडताळणी, वेतन फरक, वैद्यकीय परतावा तसेच इतर आर्थिक मंजुरीची अनेक प्रकरणे महिनोनमहिने प्रलंबित असल्याची माहिती समोर आली आहे.वेतन व भविष्य निर्वाह निधी पथक (माध्यमिक), सोलापूर येथील अधीक्षक पद रिक्त झाल्यानंतर कार्यालयीन कामकाजावर मोठा परिणाम झाला होता.
त्यामुळे जिल्हाभरातील हजारो शिक्षकांच्या आर्थिक प्रस्तावांचा निपटारा रखडला. परिणामी सुमारे ८० कोटी रुपयांची बिले मंजुरीच्या प्रतीक्षेत असल्याचे सांगितले जात आहे.या पार्श्वभूमीवर प्रशासनाने वेतन व भविष्य निर्वाह निधी पथक (प्राथमिक)चे अधीक्षक भारत कारसले यांच्याकडे माध्यमिक पथकाचा अतिरिक्त कार्यभार सोपविला आहे. या निर्णयामुळे प्रलंबित प्रस्तावांचा निपटारा वेगाने होईल, अशी अपेक्षा शिक्षक व कर्मचारी व्यक्त करत आहेत.
शिक्षक संघटनांनीही प्रलंबित बिलांचा तातडीने निपटारा करून शिक्षकांना आर्थिक दिलासा देण्याची मागणी केली आहे. विशेषतः निवृत्तीवेतन, जीपीएफ, वेतन फरक आणि इतर आर्थिक लाभांची प्रकरणे त्वरित मार्गी लावण्याची अपेक्षा व्यक्त होत आहे.दरम्यान, अतिरिक्त कार्यभार स्वीकारल्यानंतर कार्यालयातील प्रलंबित कामांना प्राधान्य देण्यात येणार असून, टप्प्याटप्प्याने सर्व प्रस्तावांचा निपटारा करण्याचा प्रयत्न केला जाणार असल्याची माहिती सूत्रांकडून मिळाली आहे.
“उद्या दुपारपर्यंत पगाराचे बिल ट्रेझरीत पाठवले जाईल.” ; शिक्षकांचे पगार उद्या दुपारपर्यंत ट्रेझरीमध्ये जातील. आज त्यांची सर्व प्रक्रिया, जसे की एकत्रित करणे (consolidate) इत्यादी, पूर्ण झाली आहे. काही कागदपत्रांवर शिक्षणाधिकारी सचिन जगताप यांच्या सह्या होणे बाकी आहे, त्यानंतर उद्या दुपारपर्यंत सर्व पगार ट्रेझरीमध्ये जमा होतील. : भारत कासले वेतन अधीक्षक
