सोलापूर : जिल्हा परिषदेच्या आरोग्य व शिक्षण समितीची सभा सभापती चेतनसिंह केदार यांच्या अध्यक्षतेखाली पंढरपूर तालुक्यातील कासेगाव प्राथमिक आरोग्य केंद्रात पार पडली. यावेळी जिल्ह्यातील रिक्त आरोग्य पदे तातडीने भरणे, बोगस डॉक्टरांविरोधात कठोर कारवाई करणे आणि ग्रामीण भागातील नागरिकांना दर्जेदार आरोग्य सेवा उपलब्ध करून देण्यासाठी प्राथमिक आरोग्य व्यवस्था अधिक सक्षम करण्याचे स्पष्ट निर्देश केदार यांनी दिले. सभेच्या प्रारंभी जिल्हा आरोग्य अधिकारी डॉ. सतीश कोपूरवाड यांनी उपस्थितांचे स्वागत करून सभेचे इतिवृत्त मांडले. तालुका आरोग्य अधिकारी डॉ. एकनाथ बोधले यांनी आषाढी वारीसाठी करण्यात आलेल्या आरोग्य नियोजनाची सविस्तर माहिती सादरीकरणाद्वारे दिली. बैठकीत कासेगाव ग्रामपंचायतीच्या पदाधिकाऱ्यांनी आरोग्य उपकेंद्र अनवली येथील रिक्त पदे भरण्याची मागणी करणारे निवेदन सभापतींना दिले. तसेच कासेगाव प्राथमिक आरोग्य केंद्राच्या इमारतीच्या दुरुस्तीबाबतही चर्चा करण्यात आली.
चेतनसिंह केदार यांनी माता-बाल संगोपन, गरोदर मातांची वेळेत सोनोग्राफी, नियमित लसीकरण, कुष्ठरोग व क्षयरोग नियंत्रण कार्यक्रम प्रभावीपणे राबविण्याचे निर्देश दिले. पालखी मार्गावरील सर्व आरोग्य केंद्रांमध्ये औषधांचा पुरेसा साठा उपलब्ध ठेवावा तसेच कोणतेही कर्मचारी पद रिक्त राहणार नाही, याची दक्षता घेण्याच्या सूचना त्यांनी संबंधित अधिकाऱ्यांना दिल्या. आषाढी वारीच्या पार्श्वभूमीवर लाखो भाविकांना दर्जेदार आरोग्य सेवा आणि आपत्कालीन वैद्यकीय सुविधा वेळेत उपलब्ध करून देण्यासाठी आरोग्य यंत्रणेने पूर्ण क्षमतेने काम करण्याचे आवाहनही त्यांनी केले.
या बैठकीस जिल्हा परिषद सदस्य सोनाली कडते, संगीता दुधाळ, संदीप टेळे, मीनाक्षी रोंगे, शोभा खटकाळे, नागनाथ भोसले, सविता कोकाटे, चंद्रकांत भालके यांच्यासह जिल्ह्यातील सर्व तालुका आरोग्य अधिकारी, वैद्यकीय अधिकारी व कर्मचारी उपस्थित होते. कार्यक्रमाच्या शेवटी जिल्हा परिषद सदस्य चंद्रकांत भालके यांनी उपस्थितांचे आभार मानले.
