या नगरातील नागरिकांनी टाकला बहिष्कार..!
सोलापूर : हद्दवाढ भागातील गणेश बिल्डर्स स्कीम नंबर तीन, अमोल नगर तसेच लोखंडवाला पार्क हा भाग नागरी सुविधांपासून वंचित असून येणाऱ्या महानगरपालिका निवडणुकीवर येथील मतदारांनी बहिष्कार टाकण्याचा निर्णय घेतला आहे.यासंदर्भात तीनही वसाहतीमधील नागरिकांनी महापालिका आयुक्त डॉ. सचिन ओम्बासे यांना निवेदन देऊन आपली मागणी मांडली आहे.
गेल्या तीस वर्षांपासून या वसाहतींना जाण्या-येण्यासाठी चांगला रस्ता नाही. ड्रेनेजलाईनची सुविधा नसल्याने गणेश बिल्डर्स स्कीम नंबर ३, अमोलनगर, लोखंडवाला पार्क येथील नागरिकांचे मोठ्या प्रमाणावर हाल होत आहेत. यापूर्वी महापालिका आयुक्त, नगर रचना अधिकारी, आमदार, खासदार यांना वारंवार भेटून निवेदन देऊनही दखल घेतली गेली नाही. नगर रचना अधिकाऱ्यांनी या भागाची स्वतः पाहणी केली आहे.
परंतु अद्याप रस्ता व ड्रेनेजलाइन झालेली नाही. त्यामुळे येथील नागरिकांनी यंदाच्या १५ जानेवारी रोजी होणाऱ्या निवडणुकीच्या मतदानावर बहिष्कार टाकण्याचा महानगरपालिका निर्णय घेतला आहे, असे या भागातील नागरिक नंदकुमार जोशी यांनी सांगितले.
