दोरखंड बांधून चारचाकीतून एटीएम बाहेर ओढले; सग्गम नगरातील मध्यरात्रीची थरारक घटना
सोलापूर : सोलापूर शहरातील घरकुल परिसरातील सग्गम नगर भागात चोरट्यांनी अक्षरशः फिल्मी स्टाईलने चोरी करत थेट एटीएम मशीनच पळवून नेल्याची धक्कादायक घटना उघडकीस आली आहे. मध्यरात्रीच्या सुमारास घडलेल्या या प्रकारामुळे परिसरात एकच खळबळ उडाली असून, वाढत्या चोरीच्या घटनांमुळे नागरिकांमध्ये भीतीचे वातावरण निर्माण झाले आहे.मिळालेल्या माहितीनुसार, अज्ञात चोरट्यांनी चारचाकी वाहनाच्या सहाय्याने एटीएम मशीनला मजबूत दोरखंड बांधला आणि जोराने ओढून मशीन बाहेर काढले.
त्यानंतर संपूर्ण एटीएम मशीन वाहनात टाकून आरोपी घटनास्थळावरून पसार झाले. संपूर्ण प्रकार अतिशय नियोजनबद्ध आणि धाडसी पद्धतीने पार पडल्याचा प्राथमिक अंदाज पोलिसांनी व्यक्त केला आहे.घटनेची माहिती मिळताच एमआयडीसी पोलिस स्टेशनचे पथक तात्काळ घटनास्थळी दाखल झाले. पोलिसांनी एटीएम सेंटरमधील दोन अंतर्गत तसेच बाहेरील एक अशा तीन सीसीटीव्ही कॅमेऱ्यांचे फुटेज ताब्यात घेतले असून, त्याद्वारे आरोपींचा शोध घेण्याचे काम सुरू करण्यात आले आहे. फुटेजमध्ये संशयित वाहन आणि काही हालचाली कैद झाल्याची माहिती समोर येत आहे.दरम्यान, चोरीला गेलेल्या एटीएम मशीनमध्ये किती रक्कम होती, याबाबत अधिकृत माहिती अद्याप जाहीर करण्यात आलेली नाही. संबंधित बँकेचे अधिकारीही घटनास्थळी दाखल झाले असून, त्यांनी परिस्थितीचा आढावा घेत पोलिसांना सहकार्य सुरू केले आहे.
सोलापूर शहरात गेल्या काही दिवसांपासून चोरी, घरफोडी आणि वाहन चोरीच्या घटनांमध्ये वाढ होत असल्याचे चित्र दिसत आहे. आता थेट बँकेच्या एटीएमवरच चोरट्यांनी डल्ला मारल्याने नागरिकांमध्ये असुरक्षिततेची भावना अधिक तीव्र झाली आहे. आरोपींना तातडीने अटक करून कठोर कारवाई करावी, अशी मागणी स्थानिक नागरिकांकडून करण्यात येत आहे.
