सोलापूर : राज्य गृह विभागाने पोलिस दलातील अधिकाऱ्यांच्या पदोन्नती व बदल्यांचे आदेश जारी केले असून, सोलापूर शहर पोलिस दलातील चार वरिष्ठ अधिकाऱ्यांना पदोन्नतीची संधी मिळाली आहे. या निर्णयामुळे शहर पोलिस दलात आनंदाचे वातावरण निर्माण झाले आहे.
पदोन्नती मिळालेल्या अधिकाऱ्यांमध्ये सदर बाजार पोलिस ठाण्याचे वरिष्ठ पोलिस निरीक्षक नामदेव बंडगर, पोलिस प्रशिक्षण केंद्रातील धनाजी शिंगाडे, जेलरोड पोलिस ठाण्याचे वरिष्ठ पोलिस निरीक्षक शिवाजी राऊत तसेच एमआयडीसी पोलिस ठाण्याचे वरिष्ठ पोलिस निरीक्षक प्रमोद वाघमारे यांचा समावेश आहे.राज्यभरातील २२४ अधिकाऱ्यांच्या पदोन्नती व बदल्यांमध्ये या अधिकाऱ्यांची निवड करण्यात आली आहे.
पदोन्नतीनंतर संबंधित अधिकाऱ्यांवर पोलिस उपअधीक्षक व अपर पोलिस अधीक्षक स्तरावरील जबाबदाऱ्या सोपविण्यात आल्या आहेत. या निर्णयामुळे सोलापूर पोलिस दलातील अनुभवी अधिकाऱ्यांना त्यांच्या कार्यक्षमतेची दखल मिळाल्याचे मानले जात आहे. कायदा व सुव्यवस्था राखणे, गुन्हे उघडकीस आणणे आणि नागरिकांशी समन्वय साधणे या क्षेत्रात उल्लेखनीय कामगिरी करणाऱ्या अधिकाऱ्यांना पदोन्नतीचा लाभ मिळाल्याने पोलिस दलाचे मनोबल उंचावले आहे.तसेच पोलीस आयुक्त एम राजकुमार यांनी पुढील वाटचालीस शुभेच्छा देण्यात आल्या.
