सोलापूर: दारूसाठी पैसे दिले नाहीत म्हणून लोखंडी हत्याराने डोक्यात वार करून तरुणाचा खून केल्याचा आरोप असलेल्या मध्यप्रदेशातील तरुणाला मुंबई उच्च न्यायालयाच्या कोल्हापूर खंडपीठाने सशर्त जामीन मंजूर केला आहे. अखिलेश समेश्वर बुनकर उर्फ कोरी (वय २४, रा. मध्यप्रदेश) असे जामीन मंजूर झालेल्या आरोपीचे नाव आहे.
१४ ऑगस्ट २०२४ रोजी सोलापूरच्या सदर बाजार पोलीस स्टेशनच्या हद्दीत ही घटना घडली होती. फिर्यादी आणि त्यांचा मुलगा बबलू अधिवासी हे सोलापूरमध्ये पेंटिंगचे काम करत होते. रात्री साडेनऊच्या सुमारास आरोपी अखिलेश याने बबलू कडे दारूसाठी पैशांची मागणी केली. पैसे देण्यास नकार दिल्याने दोघांमध्ये वाद झाला. या रागातून आरोपीने लोखंडी हत्याराने बबलूच्या डोक्यावर प्रहार केला, ज्यामध्ये बबलूचा मृत्यू झाला. याप्रकरणी भारतीय न्याय संहिता (BNS) कलम १०३(१) नुसार गुन्हा दाखल करून पोलिसांनी आरोपीला १८ ऑगस्ट रोजी अटक केली होती.सोलापूर सत्र न्यायालयाने जामीन नाकारल्यानंतर आरोपीने उच्च न्यायालयात धाव घेतली होती.
आरोपीच्या वतीने ॲड. कदीर औटी आणि ॲड. सौरभ तांदळे यांनी जोरदार युक्तिवाद केला. त्यांनी न्यायालयाच्या निदर्शनास आणून दिले की सदर घटना ही पूर्वनियोजित नसून अचानक घडलेली आहे. गुन्हा दाखल करण्यास झालेला विलंब शंकास्पद आहे.
उच्च न्यायालयाने दोन्ही बाजूंचा युक्तिवाद आणि प्रकरणातील वस्तुस्थिती विचारात घेऊन उच्च न्यायालयाचे न्यायमूर्ती मा. सचिन एस. देशमुख यांनी ३० मार्च २०२६ रोजी आरोपी अखिलेश बुनकर याला अटी व शर्तींसह जामीन मंजूर केला.आरोपीतर्फे ॲड. कदीर औटी, ॲड. सौरभ तांदळे, ॲड. वैभव बोंगे, ॲड. ओंकार फडतरे, ॲड. शिवरत्न वाघ, ॲड. मोहीम पठाण, ॲड. मनिष बाबरे आणि ॲड. रोहित थोरात यांनी काम पाहिले. तर सरकार पक्षातर्फे ॲड. नितीन पाटील यांनी बाजू मांडली.
