डीजेचा आवाज वाढला की थेट ‘डायल ११२’ कॉल करा

गणेशोत्सवात ध्वनिप्रदूषणाविरोधात पोलिसांचा नवा फंडा; तक्रारदाराची ओळख गोपनीय, काही मिनिटांत मदतीची सुविधा

सोलापूर; . गणेशोत्सवाच्या उत्साहात डीजे आणि मोठ्या आवाजाच्या साउंड सिस्टीममुळे नागरिकांना त्रास होत असेल, तर आता थेट पोलिसांच्या ‘११२’ क्रमांकावर तक्रार करता येणार आहे. पोलिस आयुक्तांनी मोठ्या आवाजाच्या साउंडरवर निर्बंध घातले असून, नियमांचे उल्लंघन करणाऱ्या मंडळांच्या पदाधिकाऱ्यांसह डीजे चालक-मालकांवर कारवाई केली जाणार आहे. विशेष म्हणजे तक्रार केल्यानंतर अवघ्या काही मिनिटांत पोलिसांची मदत मिळू शकणार असल्याने नागरिकांसाठी ‘११२’ हा प्रभावी पर्याय ठरणार आहे.

शहरात गणेशोत्सवाची धामधूम सुरू झाली असून विविध मंडळांकडून धार्मिक व सांस्कृतिक कार्यक्रमांचे आयोजन करण्यात येत आहे. मात्र, काही ठिकाणी मोठ्या आवाजातील डीजे आणि साउंडरमुळे ज्येष्ठ नागरिक, लहान मुले, विद्यार्थी तसेच रुग्णांना त्रास सहन करावा लागतो. अशा परिस्थितीत नागरिकांनी कारवाईची वाट न पाहता थेट ११२ वर संपर्क साधून तक्रार नोंदवावी, असे आवाहन करण्यात आले आहे. तक्रार प्राप्त झाल्यानंतर ती संबंधित पोलिस यंत्रणेकडे पाठविली जाते. त्यानंतर जवळील पोलिस कर्मचारी घटनास्थळी पोहोचून परिस्थितीची पाहणी करतात. नियमांचे उल्लंघन आढळल्यास संबंधितांवर कारवाई केली जाऊ शकते. त्यामुळे उत्सव साजरा करताना ध्वनिप्रदूषणाच्या नियमांचे पालन करण्याची जबाबदारी मंडळांवर असणार आहे.

तक्रारदाराची माहिती राहणार गोपनीय
मोठ्या आवाजाबाबत तक्रार केल्यास आपले नाव समोर येईल किंवा संबंधितांकडून त्रास होईल, या भीतीने अनेक नागरिक तक्रार करण्यास पुढे येत नाहीत. मात्र, ११२ वर तक्रार करणाऱ्या नागरिकाची माहिती गोपनीय ठेवली जाते. त्यामुळे नागरिकांनी कोणतीही भीती न बाळगता मदतीसाठी संपर्क साधावा.

मोबाईलमध्ये बॅलन्स नसला तरी मदत
आपत्कालीन ११२ क्रमांकावर कॉल करण्यासाठी मोबाईलमध्ये बॅलन्स असणे आवश्यक नाही. शहरात भांडण, अपघात, आग, संशयास्पद हालचाल किंवा इतर आपत्कालीन प्रसंग उद्भवल्यासही या क्रमांकावर पोलिसांची मदत मागता येते.

‘फोटो काढायचा आहे, पोलिस ठाण्यात यावे लागेल?’
कुंभार वेस परिसरातील एका मिरवणुकीदरम्यान डीजेच्या आवाजाबाबत तक्रार केल्यानंतर पोलिस काही मिनिटांत घटनास्थळी पोहोचले. तक्रारदाराला ओपीसाठी पोलिस ठाण्यात येण्यास सांगितल्यावर त्याने नाराजी व्यक्त केल्याचा प्रकारही समोर आला. तातडीची मदत मिळाल्यानंतर तक्रारीच्या पुढील प्रक्रियेत नागरिकांनी पोलिसांना आवश्यक सहकार्य करणेही महत्त्वाचे आहे.