सोलापूर : सोलापूर-हैदराबाद राष्ट्रीय महामार्गावरील शेळगी परिसरात शुक्रवारी पहाटे झालेल्या भीषण अपघाताने संपूर्ण जिल्हा हादरला. एसटी बस आणि ट्रकच्या जोरदार धडकेत एसटी चालक दादाराव भालचंद्र बनसोडे (वय ४३, रा. चिवरी, ता. उमरगा) आणि प्रवासी नागुबाई राम रेवगे (वय ४८, रा. अणदूर, ता. तुळजापूर) यांचा जागीच मृत्यू झाला. या दुर्दैवी घटनेने दोन्ही कुटुंबांवर दुःखाचा डोंगर कोसळला आहे.
पुणे जिल्ह्यातील कुरकुंभ येथून उमरग्याकडे निघालेली एसटी बस (एमएच-१४ एलबी-०३८०) पहाटे साडेचारच्या सुमारास सोलापूर बसस्थानकातून पुढे रवाना झाली होती. त्यानंतर अवघ्या काही मिनिटांत शेळगी परिसरात समोर असलेल्या ट्रकला बसची जोरदार धडक बसली. धडक इतकी भीषण होती की बसचा पुढील भाग पूर्णपणे चुराडा झाला आणि चालकाचा जागीच मृत्यू झाला. समोरील आसनावर बसलेल्या महिला प्रवाशाचाही जागीच मृत्यू झाला.अपघातावेळी बसमध्ये चालक-वाहकासह १२ प्रवासी होते.
त्यापैकी उर्वरित १० जणांना किरकोळ दुखापत झाली असून त्यांच्यावर सोलापूर शासकीय रुग्णालयात प्राथमिक उपचार करून घरी सोडण्यात आले. मोठी जीवितहानी टळल्याने प्रवाशांनी सुटकेचा निश्वास टाकला.दरम्यान, अपघातानंतर प्रवाशांच्या संतापाच्या भीतीने ट्रकचालक घटनास्थळावरून पसार झाला. माहिती मिळताच जोडभावी पोलिसांनी अवघ्या काही मिनिटांत घटनास्थळी धाव घेत पंचनामा केला. याप्रकरणी जोडभावी पोलीस ठाण्यात गुन्हा दाखल करण्यात आला असून फरार ट्रकचालकाचा कसून शोध सुरू असल्याची माहिती सहाय्यक पोलीस निरीक्षक महाडिक यांनी दिली.
१० प्रवासी बचावले..भीषण धडक असूनही बसमधील १० प्रवाशांना केवळ किरकोळ दुखापत झाली. सर्व जखमींवर सिव्हिल रुग्णालयात उपचार करण्यात आले असून त्यांची प्रकृती स्थिर आहे. मोठी दुर्घटना टळल्याने प्रवासी आणि त्यांच्या नातेवाईकांनी सुटकेचा श्वास घेतला.
फरार ट्रकचालक पोलिसांच्या रडारवर..अपघातानंतर फरार झालेल्या ट्रकचालकाचा शोध घेण्यासाठी पोलिसांनी विशेष पथक तैनात केले आहे. त्याच्या नातेवाईकांशी संपर्क साधण्यात आला असून, चालकाने लवकरात लवकर पोलिसांसमोर हजर व्हावे, असेही सांगण्यात आले आहे. पोलिसांना तो लवकरच ताब्यात मिळेल, अशी अपेक्षा आहे.
