ईदगाह मैदानांवर हजारोंची नमाज, गळाभेटीतून बंधुभाव; गरजूंना मांस वाटप करून सामाजिक ऐक्याचा संदेश
सोलापूर : सोलापूर शहरात ईद-उल-अजहा अर्थात बकरी ईदचा सण शुक्रवारी धार्मिक उत्साह, श्रद्धा आणि बंधुभावाच्या वातावरणात मोठ्या आनंदात साजरा करण्यात आला. होटगी रोड शाही आलमगीर, रंगभवन, पांगल मैदान, जुना आदिलशाही आणि असार मैदान या प्रमुख ईदगाह मैदानांवर मुस्लिम बांधवांनी सकाळी मोठ्या संख्येने उपस्थित राहून विशेष नमाज अदा केली. नमाजनंतर सर्वांनी एकमेकांना गळाभेट देत ईदच्या शुभेच्छांचा वर्षाव केला.
यावेळी धर्मगुरूंनी प्रेषित हजरत इब्राहिम आणि हजरत इस्माईल यांच्या त्यागाची परंपरा सांगत शांतता, बंधुता आणि मानवतेचा संदेश दिला. अल्लाहसाठी त्यागाची भावना व्यक्त करणारी कुर्बानीची प्रथा पार पाडण्यात आली. तसेच गरजू व गरीब कुटुंबांना मांस वाटप करून सामाजिक बांधिलकी जपण्यात आली. शहर काझी मुफ्ती सय्यद अमजदअली यांनी तरुणांना धर्माच्या नावावर समाजात तेढ निर्माण करणाऱ्या प्रोपोगेंड्यापासून दूर राहण्याचे आणि शिक्षणावर लक्ष केंद्रित करण्याचे आवाहन केले. समाजात सलोखा आणि ऐक्य कायम राखण्यासाठी सर्व धर्मगुरूंनी पुढाकार घ्यावा, असेही त्यांनी सांगितले. दरम्यान, ईदनिमित्त शहर पोलिसांकडून संवेदनशील भागात चोख बंदोबस्त ठेवण्यात आला होता. त्यामुळे सण शांततेत आणि उत्साहपूर्ण वातावरणात पार पडला.
