सोलापूर: सोलापूर शहर पोलीस आयुक्तालयाच्या ‘अनैतिक मानवी वाहतूक प्रतिबंधक कक्षाने’ (AHTU) अत्यंत कौशल्याने तपास करत, मागील सहा महिन्यांपासून बेपत्ता असलेल्या एका अल्पवयीन मुलीचा शोध लावून तिला सुरक्षित ताब्यात घेतले आहे. याप्रकरणी संशयित आरोपी सच्चुकुमार कृष्णा चंद्रबन्सी याला चाकण (पुणे) परिसरातून अटक करण्यात आली आहे.विजापूर नाका पोलीस ठाण्यात गुन्हा दाखल करण्यात आला होता.
आरोपीने पीडित अल्पवयीन मुलीला कशाचे तरी आमिष दाखवून पळवून नेले होते. विजापूर नाका पोलिसांनी यापूर्वी अनेक प्रयत्न केले, परंतु आरोपी व मुलगी मिळून आले नव्हते. अखेर ३ फेब्रुवारी २०२६ रोजी हा तपास ‘अनैतिक मानवी वाहतूक प्रतिबंधक कक्षा’कडे वर्ग करण्यात आला.
ही यशस्वी कामगिरी पोलीस आयुक्त एम राजकुमार, पोलीस उपायुक्त (गुन्हे) श्रीमती डॉ. अश्विनी पाटील व सहाय्यक पोलीस आयुक्त (गुन्हे) राजन माने, पोलीस निरीक्षक धनाजी शिंगाडे यांच्या नेतृत्वाखालील पथकात मपोलीस उपनिरीक्षक अश्विनी काळे, मपोलीस हवालदार अलका शहापुरे, पोह/८४६ महादेव बंडगर, पोना/७७० अ. सत्तार पटेल, चालक पोशि/७२४ दादा गोरे तसेच सायबर पोलीस ठाण्याचे पोह/६०१ गायकवाड व पोह/२०८ मच्छिंद्र राठोड यांच्या मार्गदर्शनाखाली पार पडली.
१८ दिवसांत लावला छडा : तपास हाती घेतल्यावर पथकाने तांत्रिक माहिती आणि गुप्त बातमीदारांच्या मदतीने अवघ्या १८ दिवसांत शोध लावला. आरोपी आणि पीडित मुलगी हे आंबेठाण रोड, बिरवडी (चाकण, पुणे) येथे असल्याची खात्री पटताच, पथकाने तिथे छापा टाकून २१ फेब्रुवारी २०२६ रोजी दोघांना ताब्यात घेतले. काल, २२ फेब्रुवारी रोजी त्यांना पुढील कार्यवाहीसाठी विजापूर नाका पोलीस स्टेशनच्या स्वाधीन करण्यात आले आहे.
