ड्रोन व GIS तंत्रज्ञानातून सर्वेक्षण; महापालिकेकडून ५ कोटींचा निधी
सोलापूर | सोलापूर महानगरपालिका हद्दीत समाविष्ट झालेल्या १२ गावांतील मालमत्ताधारकांना प्रॉपर्टी कार्ड उपलब्ध करून देण्यासाठी नगरभूमापन मोहिमेला गती देण्यात आली आहे. या कामासाठी महापालिकेने नगरभूमापन विभागाकडे ५ कोटी रुपयांचा निधी जमा केला असून अत्याधुनिक ड्रोन आणि जीआयएस तंत्रज्ञानाच्या सहाय्याने सर्वेक्षण सुरू करण्यात आले आहे.
महापौर विनायक कोंड्याल यांच्या अध्यक्षतेखाली झालेल्या आढावा बैठकीत नगरभूमापन प्रक्रियेचा सविस्तर आढावा घेण्यात आला. महाराष्ट्र शासनाच्या भूमी अभिलेख विभागामार्फत मॅपेक्स एजन्सीकडून हे सर्वेक्षण करण्यात येत आहे. या मोहिमेमुळे नागरिकांना ऑनलाइन प्रॉपर्टी कार्ड उपलब्ध होणार असून मालमत्तेशी संबंधित वाद कमी होण्यास मदत होणार आहे. तसेच प्रॉपर्टी कार्ड आणि सनद मिळाल्यानंतर बँक कर्ज, आर्थिक व्यवहार तसेच विविध शासकीय योजनांचा लाभ घेणे अधिक सुलभ होणार आहे.
मालमत्ताधारकांनी ७/१२ उतारा, कर पावती, खरेदीखत, वीज बिल, आधार कार्ड आदी आवश्यक कागदपत्रे सादर करून सर्वेक्षण प्रक्रियेस सहकार्य करावे, असे आवाहन करण्यात आले आहे. नगरसेवकांनीही नागरिक आणि नगरभूमापन कर्मचाऱ्यांमध्ये समन्वय साधून काम वेळेत पूर्ण होण्यासाठी सहकार्य करावे, असे निर्देश महापौरांनी दिले. आयुक्त डॉ. सचिन ओम्बासे यांनी नगररचना व मालमत्ता विभागामार्फत आवश्यक सर्व समन्वय उपलब्ध करून देण्याची ग्वाही दिली.
मालमत्ता व्यवहार होणार अधिक सुलभ
नगरभूमापन पूर्ण झाल्यानंतर संबंधित मालमत्तांचे अधिकृत प्रॉपर्टी कार्ड उपलब्ध होणार आहे. त्यामुळे मालकी हक्क स्पष्ट होण्यास मदत मिळणार असून बँक कर्ज, मालमत्ता खरेदी-विक्री, वारसा नोंदणी आणि शासकीय योजनांचा लाभ घेण्यातील अडचणी कमी होणार आहेत.; दीपक जमादार . नगरसेवक, सोमप
