रेल्वे स्टेशन परिसरात गवंडी कामगाराच्या गळ्यावर वार

दोन दिवसांपासून होता बेपत्ता; सिव्हिलच्या आयसीयूत व्हेंटिलेटरवर उपचार

सोलापूर, : रेल्वे स्टेशन परिसरात गवंडी काम करणाऱ्या ३३ वर्षीय तरुणाच्या गळ्यावर अज्ञात व्यक्तीने धारदार शस्त्राने प्राणघातक वार केल्याची घटना गुरुवारी (दि. १०) उघडकीस आली. सागर अशोक माने (वय ३३, रा. विजापूर रोड, सोलापूर) असे गंभीर जखमी तरुणाचे नाव आहे. त्यांच्यावर शासकीय रुग्णालयातील अतिदक्षता विभागात व्हेंटिलेटरवर उपचार सुरू असून प्रकृती चिंताजनक असल्याची माहिती त्यांच्या नातेवाइकांनी दिली.

नातेवाइकांनी दिलेल्या माहितीनुसार, सागर माने हे गवंडी काम करून उदरनिर्वाह करतात. ते गेल्या दोन दिवसांपासून बेपत्ता होते. दरम्यान, रेल्वे स्टेशन परिसरात त्यांच्या गळ्यावर धारदार शस्त्राने वार झाल्याचे समोर आले. गंभीर जखमी अवस्थेत त्यांना उपचारासाठी शासकीय रुग्णालयात दाखल करण्यात आले. गळ्याला गंभीर दुखापत झाल्याने त्यांच्यावर शस्त्रक्रिया करण्यात आली असून सध्या आयसीयूमध्ये व्हेंटिलेटरवर उपचार सुरू आहेत. सागर यांचा कौटुंबिक वाद सुरू असल्याने त्यांची पत्नी वेगळी राहत असल्याचे नातेवाइकांनी सांगितले. तसेच सागर यांची बहीण विद्या माने हिने प्रेमविवाह केला असून तिच्या सासरच्या मंडळींकडून तिला त्रास दिला जात असल्याचा आरोप कुटुंबीयांनी केला आहे. बहिणीच्या कौटुंबिक वादात भाऊ म्हणून सागर हे मध्यस्थी करत असत. यापूर्वीही याच कारणातून सागर यांना मारहाण झाल्याचा दावा नातेवाइकांनी केला आहे.

या पूर्ववैमनस्यातूनच सागर यांच्यावर हल्ला घडवून आणण्यात आल्याचा संशय त्यांच्या आई आणि बहीण विद्या माने यांनी व्यक्त केला आहे. त्यांनी काही व्यक्तींवर संशय व्यक्त केला असला तरी या आरोपांची पोलिसांकडून अधिकृत पुष्टी झालेली नाही. हल्ल्यामागील नेमके कारण आणि हल्लेखोर कोण, हे पोलिस तपासानंतर स्पष्ट होणार आहे. दरम्यान, या प्रकरणी पोलिसांत गुन्हा दाखल करण्याची प्रक्रिया सुरू असल्याची माहिती नातेवाइकांनी दिली. सागर यांची प्रकृती गंभीर असल्याने कुटुंबीयांमध्ये चिंतेचे वातावरण आहे.

दोन दिवसांपासून शोध सुरू
सागर माने हे दोन दिवसांपासून घरी परतले नसल्याने कुटुंबीय त्यांचा शोध घेत होते. त्यानंतर ते गंभीर जखमी अवस्थेत आढळल्याची माहिती कुटुंबीयांना मिळाली. गळ्यावर गंभीर वार झाल्यामुळे त्यांना तातडीने रुग्णालयात दाखल करण्यात आले. हल्ल्यापूर्वी सागर कुठे होते, ते कोणासोबत होते आणि रेल्वे स्टेशन परिसरात नेमके काय घडले, याचा उलगडा पोलिस तपासातून होण्याची शक्यता आहे.