सोलापूर ; सोलापूर जिल्हा परिषदेच्या आवारात सध्या दुचाकी व चारचाकी वाहनांसाठी असलेली पार्किंग व्यवस्था अपुरी पडत असून, आगामी पदाधिकारी निवडीनंतर वाहनसंख्या वाढणार असल्याने प्रशासनासमोर पार्किंगचा मोठा प्रश्न निर्माण झाला आहे. अध्यक्ष, उपाध्यक्ष, सभापती तसेच नव्याने निवडून आलेल्या सदस्यांच्या वाहनांसाठी जागा उपलब्ध करून देणे ही मोठी कसरत ठरणार आहे.
सध्या जिल्हा परिषद परिसरात सुमारे पाचशेहून अधिक दुचाकी आणि ३० पेक्षा जास्त चारचाकी वाहनांची पार्किंग व्यवस्था आहे. मात्र पदाधिकारी, अधिकारी आणि कर्मचाऱ्यांची वाहनेच या जागेत बसत नसल्याने अनेकदा वाहने रस्त्यावरच उभी करावी लागतात. विशेष बैठका, कार्यक्रम किंवा निवड प्रक्रियेच्या वेळी ही समस्या अधिकच तीव्र होते.
१८ मार्च रोजी जिल्हा परिषद अध्यक्ष व इतर पदाधिकाऱ्यांची निवड होणार असून ६८ नव्या सदस्यांची वाहने यामध्ये वाढणार आहेत. त्याचबरोबर पालकमंत्री, आमदार आणि इतर मान्यवरांची उपस्थिती राहणार असल्याने त्या दिवशी वाहनांची मोठी गर्दी होण्याची शक्यता आहे. प्रत्येक सदस्यासोबत कार्यकर्तेही येत असल्याने परिस्थिती आणखी गुंतागुंतीची होऊ शकते. सध्या पर्यायी पार्किंगची कोणतीही व्यवस्था नसल्याने निवडीच्या दिवशी अनेक वाहने रस्त्यांवरच उभी राहण्याची शक्यता आहे. यामुळे परिसरातील वाहतूक कोंडी वाढण्याची भीती व्यक्त केली जात आहे.
या पार्श्वभूमीवर जिल्हा परिषद प्रशासनाला पर्यायी पार्किंगची व्यवस्था करण्याबाबत तातडीने निर्णय घ्यावा लागणार आहे. याबाबत मुख्य कार्यकारी अधिकारी कुलदीप जंगम लवकरच पर्यायी जागेचा विचार करून निर्णय घेणार असल्याची माहिती प्रशासनाकडून देण्यात आली आहे.
