सोलापूर : सोलापूर शहर व परिसरात शनिवारी (ता. २३) रात्री अवकाळी पावसाने जोरदार हजेरी लावली. या पावसामुळे शहराच्या कमाल तापमानात ०.२ अंश सेल्सिअसची तर किमान तापमानात ३.२ अंश सेल्सिअसची घट झाली आहे. वाढत्या उकाड्यामुळे त्रस्त झालेल्या नागरिकांना या पावसामुळे दिलासा मिळाला आहे. आज (रविवारी) सोलापुरात ३९.८ अंश सेल्सिअस कमाल तर २३.७ अंश सेल्सिअस किमान तापमानाची नोंद झाली. शनिवारी हेच तापमान अनुक्रमे ४० अंश व २६.९ अंश सेल्सिअस इतके होते. मागील २४ तासांत (शनिवार सकाळी साडेआठ ते रविवार सकाळी साडेआठ) ६.७ मिलिमीटर पावसाची नोंद झाली आहे. आज दिवसभर अधूनमधून ढगाळ वातावरण राहिल्याने उन्हाची तीव्रता तुलनेने कमी जाणवली.
हवामान विभागाने पुढील संपूर्ण आठवडा ढगाळ वातावरणासह अवकाळी पावसाचा अंदाज वर्तवला आहे. तसेच ३० मे पर्यंत तापमान ३९ ते ४० अंश सेल्सिअस दरम्यान राहण्याची शक्यता आहे. यंदाच्या उन्हाळ्यात मे महिन्यात उच्चांकी ४४ अंश सेल्सिअस तापमानाची नोंद झाली आहे. मात्र महिन्यातील अनेक दिवस ढगाळ वातावरण व अवकाळी पावसाचे राहिले आहेत. मृग नक्षत्र ८ जूनपासून यंदा ८ जून रोजी मृग नक्षत्राला सुरवात होत असून, सूर्याचा मृग नक्षत्रात प्रवेश होणार आहे. या प्रवेशाचे वाहन ‘बेडूक’ असल्याने चांगल्या पावसाची शक्यता मानली जाते. शेतकऱ्यांच्या अपेक्षा मृग नक्षत्राच्या या पावसावर केंद्रित आहेत.
