सोलापूर : भारतीय संविधानाने लोकशाहीमध्ये शिक्षकांसाठी स्वतंत्र असा मतदारसंघ निर्माण केला आहे. शिक्षकांचे प्रश्न सुटावेत, शिक्षकांना न्याय मिळावा, यासाठी स्वतंत्र मतदारसंघ तयार करण्यात आले आहेत. त्यामुळे शिक्षक मतदारसंघात शिक्षकच आमदार असायला हवा, असे मत माजी आमदार तथा पुणे विभाग शिक्षक मतदारसंघातील उमेदवार दत्तात्रय सावंत यांनी व्यक्त केले.
जुळे सोलापूर येथील शिक्षकांच्या मेळाव्यात ते बोलत होते. आज शिक्षकांच्या अनेक समस्या ज्वलंत आहेत. जुनी पेन्शन योजना, टीईटी, शालार्थ आयडी या प्रश्नावर काम करण्याची गरज आहे. शिक्षकांची चळवळ टिकली पाहिजे यासाठी आपला प्रयत्न राहणार आहे. आज शिक्षक मतदारसंघात शिक्षक सोडून इतर लोकांचा शिरकाव होत आहे. ते आपल्यासाठी हानिकारक आहे. किमान त्यांना शिक्षकांच्या प्रश्नांची जाण असली पाहिजे. आपण सर्वजण सुशिक्षित आहोत. हा मतदारसंघ शिक्षक सोडून इतरांकडे जाऊ देऊ नये, अन्यथा शिक्षकांच्या समस्या कधीही सुटणार नाहीत. त्या वाढत जाणार आहेत. त्यामुळे शिक्षकांनी जागरूक राहून मतदान केले पाहिजे. आपण निवडून आल्यानंतर शिक्षकांना नक्कीच न्याय देऊ, असे आश्वासन त्यांनी दिले.
