पुणे विभागातील शिक्षण उपसंचालक गणपत मोरे यांची शिक्षण संचालनालयात नियुक्ती; मुंबई महापालिकेतील मच्छिंद्रनाथ कदम यांची पुण्यात बदली
सोलापूर :राज्याच्या शालेय शिक्षण विभागात प्रशासकीय स्तरावर बदल्या करण्यात आल्या असून, महाराष्ट्र शासनाच्या २१ ऑक्टोबर २०२६ रोजीच्या आदेशानुसार शिक्षण उपसंचालक पदावरील दोन अधिकाऱ्यांच्या पदस्थापनेत बदल करण्यात आला आहे. या निर्णयामुळे पुणे आणि मुंबई येथील शिक्षण विभागाच्या प्रशासकीय कामकाजात बदल होणार आहे.
शासन आदेशानुसार, पुणे विभागीय शिक्षण उपसंचालक (गट-अ) गणपत मोरे यांची शिक्षण उपसंचालक, शिक्षण संचालनालय (योजना), महाराष्ट्र राज्य, पुणे येथे बदली करण्यात आली आहे. तर मुंबई महानगरपालिकेतील शिक्षणाधिकारी पदावर कार्यरत असलेले मच्छिंद्रनाथ कदम यांची पुणे विभागीय शिक्षण उपसंचालक (गट-अ) पदावर नियुक्ती करण्यात आली आहे.
सदर बदल्या सक्षम प्राधिकाऱ्याच्या मान्यतेने करण्यात आल्या आहेत. बदली झालेल्या अधिकाऱ्यांनी शासनाने निश्चित केलेल्या विहित कालावधीत नवीन पदस्थापनेच्या ठिकाणी रुजू होऊन त्याबाबतचा अहवाल शासनास सादर करावा, असे आदेशात नमूद करण्यात आले आहे. या आदेशावर महाराष्ट्र शासनाच्या वतीने उपसचिव मोहिनुद्दीन बी. ताशिलदार यांनी डिजिटल स्वाक्षरी केली आहे. शालेय शिक्षण विभागाच्या प्रशासकीय कामकाजाच्या दृष्टीने या बदल्यांना महत्त्व प्राप्त झाले आहे.
