27 जानेवारी रोजी देशव्यापी संपाची हाक
सोलापूर : संयुक्त बँक कर्मचारी संघटनांच्या वतीने आज देशभरात ऑल इंडिया बँक संप पुकारण्यात आला. United Forum of Bank Unions (UFBU) च्या नेतृत्वाखाली सार्वजनिक क्षेत्रातील बँक अधिकारी व कर्मचाऱ्यांनी आपल्या दीर्घकाळ प्रलंबित मागण्यांसाठी, विशेषतः ५ दिवसांचा कार्यआठवडा तात्काळ लागू करण्याच्या मागणीसाठी, एकदिवसीय संपात मोठ्या संख्येने सहभाग नोंदवला. या संपाला देशभरातून उत्स्फूर्त प्रतिसाद मिळाला. महाराष्ट्रामध्ये मुंबई, पुणे, कोल्हापूर, सोलापूर, रत्नागिरी, सांगली, नाशिक व नागपूर येथे बँक अधिकारी व कर्मचाऱ्यांनी एकजुटीने सहभाग घेतला.
बँक कर्मचाऱ्यांचे म्हणणे आहे की, वाढता कामाचा ताण, तीव्र मनुष्यबळाची कमतरता आणि सतत ढासळणारा काम–जीवन समतोल यामुळे कर्मचाऱ्यांच्या शारीरिक व मानसिक आरोग्यावर गंभीर परिणाम होत आहे. परिणामी ग्राहक सेवेच्या गुणवत्तेवर तसेच बँकांच्या एकूण कार्यक्षमतेवरही विपरीत परिणाम होत असल्याचे संघटनांनी स्पष्ट केले. या देशव्यापी संपात AIBOC, AIBEA, BEFI, INBEF, INBOC, NOBW आणि NOBO या सर्व घटक संघटनांनी एकत्रितपणे सहभाग घेत सरकारकडे तातडीने सकारात्मक निर्णय घेण्याची ठाम मागणी केली.
संघटनांच्या मते, ५ दिवसांचा कार्यआठवडा लागू झाल्यास बँक कर्मचाऱ्यांचे मनोबल वाढेल, ग्राहक सेवा अधिक दर्जेदार बनेल आणि बँकिंग प्रणाली अधिक सक्षम व कार्यक्षम होईल. सरकारने मागण्यांकडे दुर्लक्ष केल्यास पुढील काळात अधिक व्यापक व तीव्र आंदोलन छेडण्याचा इशाराही यावेळी देण्यात आला.
