सोलापूर ; सोलापूर महापालिकेची नवीन टर्ममधील पहिली सर्वसाधारण सभा शुक्रवार, दि. २० फेब्रुवारी रोजी सकाळी ११ वाजता बोलवण्यात आली आहे. या सभेमध्ये १० स्वीकृत सदस्य, स्थावी समितीचे १६ तर परिवहन समितीच्या १२ सदस्यांची नियुक्ती होणार आहे. स्वीकृत सदस्यासाठी बुधवारपासून अर्ज स्वीकृती होणार आहे.
नूतन महापौर विनायक कोंड्याल यांच्या अध्यक्षतेखाली ही सभा होणार आहे. ही सभा शुक्रवार, २० फेब्रुवारी रोजी सकाळी ११ वाजता महानगरपालिकेच्या
कै, यशवंतराव बळवंतराव सभागृह (कौन्सिल हॉल) येथे होणार आहे. महापालिकेचे नगरसचिव प्रवीण दंतकाळे यांनी या सभेचा अजेंडा प्रसिध्द केला आहे. या अजेंड्यानुसार विविध नेमणुका होणार आहेत. महापालिकेच्या नामनिर्दे शित अर्थात १० स्वीकृत सदस्यांच्या नियुक्तीकरिता संबंधितांना बुधवार, दि. १८ फेब्रुवारी रोजी सकाळी ११ ते दुपारी १.३० वाजेपर्यंत महापालिकेतील आयुक्त कार्यालयात अर्ज सादर करावे लागणार आहे, असे महापालिका सभेच्या अजेंड्यात नमूद करण्यात आले आहे.
महाराष्ट्र महानगरपालिका अधिनियमचे कलम २० (२) मध्ये तरतूद केल्याप्रमाणे आयुक्त यांच्या दि.९ फेब्रुवारीच्या टिपणीत नमूद केल्याप्रमाणे स्थायी समितीच्या १६ सदस्याच्या नेमणुका करण्यात येणार आहेत. आयक्तांच्या दि.९ फेब्रुवारीच्या टिपणीत नमूद केल्याप्रमाणे १२ सदस्यांची नेमणुका करण्याचा विषय सभेच्या अजेंड्यावर आहे. याशिवाय महाराष्ट्र महानगरपालिका (नामनिर्देशित सदस्यांची अर्हता व नियुक्त्या) नियम २०१२ नुसार सोलापूर महानगरपालिकेत १० नामनिर्दे शित सदस्यांची आयुक्तांच्या दि.९ फेब्रुवारीच्या टिपणीत नमूदप्रमाणे नियुक्ती करण्याचा विषय सभेपुढे ठेवण्यात आला आहे. प्रशासकीय प्रस्तावांबरोबर सभासद प्रस्तावदेखील सभा पटलावर आहेत.
अनेक इच्छुक: लॉटरी कोणाला लागणार
दि. २० रोजीच्या सभेत १० स्वीकृत सदस्य, स्थायी समितीचे १६ तर परिवहन समितीच्या १२ सदस्यांची नियुक्ती होणार आहे. स्वीकृत सदस्यासाठी भाजप कार्यालयात शेकडो अर्ज आले आहेत. आता परिवहन सदस्यपद आणि सभापतीपद मिळवण्यासाठी लॉबींग होणार आहे. ज्या इच्छुकांची स्वीकृत सदस्यपदी वर्णी लागणार नाही, त्यांचा परिवहनसाठी विचार केला जाण्याची शक्यता आहे.
तडवळवकर यांचे नाव निश्चित
भाजपकडून ९ स्वीकृत सदस्य निवडले जाणार आहेत. यामध्ये भाजपच्या शहराध्यक्ष रोहिणी तडवळकर यांचे नाव जवळपास निश्चित झाले आहे. उर्वरित ८ सदस्यांमध्ये कोणाचा नंबर लागणार याची उत्सुकता आहे. मिळालेल्या माहितीनुसार देवेंद्र कोठे यांच्याकडे चार, आ. विजय देशमुख आणि सुभाष देशमुख यांच्या गटाकडील प्रत्येकी दोन सदस्यांना स्वीकृतची संधी मिळेल, असे बोलले जात आहे.
