सोलापूर: देशभरात आपल्या शिस्तीसाठी आणि अलोट उत्साहासाठी प्रसिद्ध असलेल्या सोलापूरच्या डॉ. बाबासाहेब आंबेडकर जयंती उत्सवासाठी यंदा विशेष शासकीय आयोजनाची मागणी करण्यात आली आहे. सन २०२६ च्या जयंतीनिमित्त सोलापूर शहरातील हुतात्मा स्मृती मंदिर येथे महाराष्ट्र शासनाच्या सांस्कृतिक कार्य विभागामार्फत दोन दिवसीय भव्य “भीम जल्लोष” या सांस्कृतिक कार्यक्रमाचे आयोजन करण्यात यावे, असे निवेदन नगरसेवक दीपक जमादार, सत्यजित वाघमोडे, मधुसूदन जंगम यांनी राज्याचे सांस्कृतिक कार्य व माहिती तंत्रज्ञान मंत्री ॲड. आशिष शेलार यांना दिले.
सोलापूरमध्ये साजरा होणारा “भीम जयंती सप्ताह” हा केवळ स्थानिकच नव्हे, तर राज्यभरातील आकर्षण असतो. या सप्ताहात लाखो भीम अनुयायी मोठ्या श्रद्धेने सहभागी होतात. या उत्सवाला सांस्कृतिक आणि वैचारिक जोड देण्यासाठी शासनाने पुढाकार घ्यावा, अशी भावना निवेदनात व्यक्त करण्यात आली आहे. यावेळी त्यांनी नमूद केले की, हुतात्मा स्मृती मंदिर येथे दोन दिवस भव्य भीम गीतांचा कार्यक्रम, प्रबोधनात्मक सादरीकरणे आणि सांस्कृतिक कलाविष्कारांचे आयोजन केल्यास या उत्सवाची भव्यता अधिक वाढेल.
मंत्री आशिष शेलार यांनी या निवेदनाचा सकारात्मक विचार करण्याचे आश्वासन दिले असून, सांस्कृतिक कार्य विभागामार्फत यावर आवश्यक ती कार्यवाही करण्याचे संकेत दिले आहेत. या मागणीमुळे सोलापूरच्या भीम अनुयायांमध्ये उत्साहाचे वातावरण असून, यंदाचा जयंती उत्सव अधिक दिमाखदार होण्याची चिन्हे दिसत आहेत
