सोलापूर : सोलापूर महापालिका मालमत्ता कर विभागाकडून चालू आर्थिक वर्षात मार्च अखेर सर्व प्रकारच्या वसुलीतून तब्बल २७९ कोटी ३९ लाख २५ हजार ३०० रुपयांचा कर महापालिकेच्या तिजोरीत जमा करण्यात आल्याची माहिती महापालिका उपायुक्त आशिष लोकरे यांनी दिली.विभागाच्या या वसुलीचे महापालिका प्रशासनाकडून कौतुक करण्यात आले. सोलापूर शहर आणि हद्दवाढ भागातील २ लाख ७५ हजार मालमत्तांची महापालिका मालमत्ता कर विभागाकडे नोंद आहे. या विभागाला ३१८ कोटी ४७ लाख रुपयांचे वसुलीचे उद्दिष्ट विभागाला देण्यात आले होते. मालमत्ता कराच्या थकबाकी पोटी विभागाकडून दहा हजार मिळकतदारांना नोटीसा बजावण्यात आल्या होत्या.
दि. १४ मार्च २०२६ रोजी झालेल्या लोक अदालती नंतर मार्च अखेरपर्यंत थकबाकी मिळकतदारांना त्यांच्या शास्ती आणि दंड यामध्ये ५० टक्के सूट देणारी योजना सुरू करण्यात आली होती. यानंतर गेल्या १७ दिवसात तब्बल ९ हजार ४५३ थकबाकी मिळकतदारांनी १७ कोटी २४ लाख ९९ हजार २४५ रुपयांचा कर महापालिकेच्या कर विभागाकडे जमा केला. यामध्ये आज शेवटच्या ३१ मार्च दिवशी १४०८ मकतदारांनी २ कोटी ८८ लाख ६२ हजार ९८० रुपये कर जमा केल्याचा समावेश आहे. यानुसार आत्तापर्यंत आर्थिक वर्षात गेल्या वर्षभरात १ लाख ३६ हजार ५९२ मिळकतदारांनी १८४ कोटी १२ लाख रुपयांचा कर जमा केला आहे. मालमत्ता कराशिवाय या मीटर, पाणीपट्टी, कर आणि मालमत्ता हस्तांतर फी तसेच इतर या बाबींमधून महापालिकेच्या मालमत्ता कर विभागाने तब्बल २७९ कोटी ३९ लाख २५ हजार ३०० रुपयांचा एकूण कर जमा केला आहे. उद्दिष्टानुसार केली ८७.७४ टक्के वसूलीमहापालिकेने अंदाजपत्रकात दिलेल्या एकूण ३१८ कोटी ४७ लाख रुपयांच्या उद्दिष्टानुसार ८७.७४ टक्के वसूली तर नंतर सुधारित अंदाजपत्रकाप्रमाणे दिलेल्या ३४० कोटी रुपयांच्या उद्दिष्टानुसार ८२ टक्के वसुली करण्यात आल्याची माहिती महापालिकेच्या मालमत्ता कर विभागाचे अधिक्षक युवराज गाडेकर यांनी दिली
