सोलापूर- दक्षिण सोलापूर तालुक्यातील इंगळगी येथील ग्रामदैवत श्री गुरु रेवणसिद्धेश्वर यात्रेनिमित्त शनिवार, दि. 18 ते सोमवार, दि. 20 एप्रिल 2026 या कालावधीत विविध धार्मिक व सांस्कृतिक कार्यक्रमांचे भव्य आयोजन करण्यात आले असल्याची माहिती यात्रा उत्सव समितीचे सदस्य श्री शिवानंद हत्तुरे यांनी दिली.दरवर्षीप्रमाणे अक्षयतृतीयेनिमित्त या यात्रेचे आयोजन करण्यात येते.
यात्रेची सुरुवात शनिवार, दि. 18 एप्रिल रोजी सायंकाळी 6 वाजता गावातील सर्व ग्रामदैवतांच्या तैलाभिषेकाने व दीपोत्सवाने होणार आहे. रविवार, दि. 19 एप्रिल रोजी सकाळी 9 वाजता महात्मा बसवेश्वर महाराज जयंतीनिमित्त बैलजोड्यांची भव्य मिरवणूक काढण्यात येणार आहे. दुपारी 4 वाजता नंदीध्वजांची मिरवणूक पार पडेल. या मिरवणुकीत वीरभद्र पुरवंत तसेच कर्नाटकातील विजापूर येथील कलाकार महिषासुर, रावण आदी ऐतिहासिक पात्रांच्या वेशभूषेत सहभागी होणार आहेत. सायंकाळी 7 वाजता सिद्धार्थ भडकुंबे यांचा संगीत संध्या कार्यक्रम होईल, तर रात्री 8 वाजता मोहोळ येथील कीर्तनकार ह. भ. प. गोपाळ प्रकाश पाटील यांचे कीर्तन आयोजित करण्यात आले
आहे.सोमवार, दि. 20 एप्रिल रोजी सकाळी 10 वाजता धनगरी ओव्यांचा कार्यक्रम होणार असून यात कुरघोट येथील अमोघसिद्ध गायन संघ व इंगळगी येथील बीरलिंगेश्वर गायन संघ सहभागी होणार आहेत. दुपारी 4 वाजता कुस्त्यांचा फड रंगणार असून 101 रुपयांपासून ते 1 लाख रुपयांपर्यंतच्या कुस्त्या होणार आहेत. सायंकाळी 7 वाजता मुंबई विद्यापीठाच्या लोककला अकादमीचे प्रमुख श्री योगेश चिकटगावकर व त्यांच्या सहकाऱ्यांचा “लोककलेची ललकार” हा विशेष सांस्कृतिक कार्यक्रम सादर होणार आहे.
यात्रा कालावधीत दोन्ही दिवशी रेवणसिद्धेश्वर मंदिर परिसरात भाविकांसाठी महाप्रसादाची व्यवस्था करण्यात आली आहे. पंचक्रोशीतील नागरिकांनी या धार्मिक व सांस्कृतिक सोहळ्यांचा लाभ घ्यावा, असे आवाहन यात्रा उत्सव समितीच्या वतीने करण्यात आले आहे.
