जव्हेरी अॅडव्हर्टायझिंगचे प्रमुख संचालक संदीप जव्हेरींचे निधन

सोलापूर ; येथील जाहिरात क्षेत्रात अग्रगण नाव असलेल्या जव्हेरी अॅडव्हर्टायझिंग ग्रुपचे प्रमुख संचालक संदीप अरविंद जव्हेरी (वय ५४) यांचे शुक्रवारी सायंकाळी पाचच्या सुमारास निधन झाले. त्यांची अंत्ययात्रा शनिवारी सकाळी १० वाजता राहत्या घरापासून (जुना आरटीओ कार्यालय, रेल्वेलाइन्स) निघेल. त्यांच्या पार्थिवावर मोदी स्मशानभूमीत अंत्यसंस्कार करण्यात येणार आहेत. त्यांच्या इच्छेनुसार मरणोत्तर नेत्रदान करण्यात आले आहे. त्यांच्या मागे आई, कल्पेश आणि अक्षय असे दोघे बंधू, पत्नी, दोन मुली असा परिवार आहे
.
जाहिरातींसह संदीप जव्हेरी यांचा सोलापूरच्या सामाजिक, धार्मिक आणि सेवाभावी संस्थांमध्ये वावर होता. गुजराती मित्र मंडळाचे गेली २५ वर्षे सहसचिव म्हणून कार्यरत होते. वडील अरविंदभाई जव्हेरी यांच्या स्मृत्यर्थ दरवर्षी व्याख्यानमालेचे आयोजन करत. वक्त्यांमध्ये एक गुजराती वक्ता आवर्जून बोलवत. रोटरी क्लब ऑफ सोलापूरचे सदस्य आणि आगामी अध्यक्षही होते. रेडक्रॉस सोसायटीचे सदस्य, भारती विद्यापीठ माजी विद्यार्थी संघटना, सेंट जोसेफ हायस्कूल माजी विद्यार्थी संघ यांसह अनेक सामाजिक आणि शैक्षणिक संस्थांमध्ये ते कार्यरत होते. जाहिरात क्षेत्रातील व्यावसायिकांना एकत्र आणण्यासाठी त्यांनी ‘सोलापूर अॅडव्हर्टाझर्स वेल्फेअर असोसिएशन’ (सावा) चे ते संस्थापक होते.