सोलापूर : सोलापूर जिल्ह्याच्या सर्वांगीण विकासाला चालना देणारा महत्त्वपूर्ण निर्णय म्हणून मोहोळ–कुरुल–कामती–तेरा मैल–बसवनगर–औराद–बंकलगी–वळसंग या राष्ट्रीय महामार्ग 465 च्या उन्नतीकरणास केंद्र सरकारकडून मंजुरी देण्यात आली आहे. या प्रकल्पामुळे जिल्ह्याच्या पायाभूत सुविधांमध्ये मोठी भर पडणार आहे.या महामार्गाचे 2/4 पदरीकरण पेव्ड शोल्डरसह करण्यात येणार असून, एकूण 81.37 किमी लांबीच्या या प्रकल्पासाठी सुमारे 740.38 कोटी रुपयांचा खर्च अपेक्षित आहे.
रस्त्याची गुणवत्ता उंचावून सुरक्षित आणि वेगवान वाहतुकीसाठी आधुनिक तंत्रज्ञानाचा वापर केला जाणार आहे. या मार्गावर आवश्यक त्या ठिकाणी पूल, नाले, सर्व्हिस रोड, बसथांबे आणि सुरक्षा उपाययोजना करण्यात येणार आहेत.या प्रकल्पासाठी खासदार प्रणिती शिंदे यांनी केंद्रीय रस्ते वाहतूक व महामार्ग मंत्री नितीन गडकरी यांच्याकडे सातत्याने पाठपुरावा केला होता. त्यांनी दिल्ली येथे विविध बैठका घेऊन या मार्गाच्या दुरुस्ती आणि उन्नतीकरणाची गरज अधोरेखित केली होती. परिणामी, केंद्रीय स्टँडिंग फायनान्स कमिटीने या प्रस्तावास हिरवा कंदील दाखवला आहे.या महामार्गाचे उन्नतीकरण पूर्ण झाल्यानंतर सोलापूर ते सीमावर्ती भागांदरम्यानचा प्रवास अधिक सोयीस्कर आणि कमी वेळात होणार आहे. विशेषतः मोहोळ, कुरुल, बसवनगर, औराद, बंकलगी आणि वळसंग परिसरातील नागरिकांना याचा मोठा फायदा होणार आहे. दररोज या मार्गावर होणारी वाहनांची वर्दळ लक्षात घेता हा निर्णय अत्यंत महत्त्वाचा मानला जात आहे.या रस्त्यामुळे शेतकऱ्यांना त्यांच्या कृषी मालाची वाहतूक जलद गतीने करता येणार असून, बाजारपेठांपर्यंत पोहोचणे सुलभ होईल.
त्यामुळे कृषी उत्पन्नाला चांगला दर मिळण्यास मदत होईल. तसेच दुग्ध व्यवसाय, भाजीपाला आणि इतर कृषीपूरक उद्योगांनाही चालना मिळणार आहे.औद्योगिकदृष्ट्याही या मार्गाचे महत्त्व मोठे आहे. सोलापूर जिल्ह्यातील औद्योगिक वसाहती आणि लघुउद्योगांना जोडणारा हा मार्ग असल्यामुळे मालवाहतुकीचा वेळ आणि खर्च कमी होईल. यामुळे गुंतवणूक वाढण्यासही मदत होईल, अशी अपेक्षा व्यक्त केली जात आहे.याशिवाय, रस्त्याच्या उन्नतीकरणामुळे अपघातांची संख्या कमी होण्यास मदत होईल. रुंद आणि सुस्थितीत रस्ते, योग्य सिग्नलिंग, रिफ्लेक्टर्स, स्पीड ब्रेकर आणि अन्य सुरक्षात्मक उपायांमुळे वाहनचालकांना अधिक सुरक्षित प्रवास करता येईल.स्थानिक नागरिकांनी या निर्णयाचे स्वागत करत आनंद व्यक्त केला आहे.
अनेक वर्षांपासून या रस्त्याची अवस्था खराब होती. खड्डे, अरुंद रस्ता आणि अपुरी देखभाल यामुळे नागरिकांना मोठ्या अडचणींचा सामना करावा लागत होता. आता या प्रकल्पामुळे त्या समस्यांवर कायमस्वरूपी तोडगा निघणार आहे.दरम्यान, प्रशासनाने लवकरच निविदा प्रक्रिया पूर्ण करून कामाला सुरुवात करावी, अशी मागणी स्थानिकांनी केली आहे. वेळेत आणि दर्जेदार काम पूर्ण व्हावे, यासाठी लोकप्रतिनिधींनीही लक्ष ठेवावे, अशी अपेक्षा व्यक्त होत आहे.एकूणच, या प्रकल्पामुळे सोलापूर जिल्ह्याच्या विकासाला नवे बळ मिळणार असून, वाहतूक, उद्योग, शेती आणि दळणवळण क्षेत्रात सकारात्मक बदल घडण्याची चिन्हे दिसत आहेत.
