सोलापूर : राष्ट्रीय पात्रता व प्रवेश परीक्षा (NEET) सुरळीत, पारदर्शक आणि नियोजनबद्ध पद्धतीने पार पडावी यासाठी जिल्हा परिषदेचे मुख्य कार्यकारी अधिकारी कुशल जैन यांनी आज सोलापूर शहरातील विविध परीक्षा केंद्रांना प्रत्यक्ष भेट देत पाहणी केली.
त्यांच्या या सक्रिय व संवेदनशील कार्यपद्धतीमुळे परीक्षा व्यवस्थापनात काटेकोरपणा दिसून आला.कुशल जैन यांनी परीक्षा केंद्रांवरील कंट्रोल रूम, परीक्षा दालने तसेच विद्यार्थ्यांसाठी उपलब्ध करून देण्यात आलेल्या मूलभूत सुविधांची सखोल तपासणी केली. यावेळी स्वच्छता, पिण्याचे पाणी, बसण्याची व्यवस्था, सुरक्षा यंत्रणा, तसेच आपत्कालीन सेवांची तयारी याबाबत त्यांनी अधिकाऱ्यांना आवश्यक सूचना दिल्या.
हरीभाई देवकरण हायस्कूल, पानगल हायस्कूल, सिद्धेश्वर प्रशाला आणि संगमेश्वर महाविद्यालय या केंद्रांना भेट देत त्यांनी प्रत्येक ठिकाणी व्यवस्थापनाचा बारकाईने आढावा घेतला. विद्यार्थ्यांना कोणतीही अडचण निर्माण होऊ नये, तसेच परीक्षा पूर्णतः शांततेत आणि शिस्तीत पार पडावी यासाठी त्यांनी विशेष लक्ष दिले.या पाहणीदरम्यान माध्यमिक शिक्षणाधिकारी सचिन जगताप हे देखील उपस्थित होते. त्यांनीही परीक्षा प्रक्रियेबाबत माहिती देत समन्वय साधला.कुशल जैन यांच्या पुढाकारामुळे जिल्ह्यातील परीक्षा व्यवस्थापन अधिक सक्षम व विश्वासार्ह बनले असून, विद्यार्थ्यांसाठी सुरक्षित व अनुकूल वातावरण निर्माण करण्यासाठी प्रशासन कटिबद्ध असल्याचे यावेळी स्पष्ट झाले.
एकूण परीक्षा केंद्र =15
एकूण परीक्षार्थी विद्यार्थी =5691
उपस्थित परीक्षार्थी =5566
गैरहजर परीक्षार्थी = 125
टक्केवारी = 97.80
