ग्रामीण स्थानिक गुन्हे शाखेची कामगिरी
सोलापूर : ग्रामीण स्थानिक गुन्हे शाखेच्या पोलीस पथकाने जबरी चोरी, घरफोडी असे विविध गंभीर २२ गुन्हे दाखल असलेल्या एका सराईत गुन्हेगाराला अटक करून सव्वा २ लाख रुपयाचा मुद्देमाल जप्त केला आहे.गोपी विजय चव्हाण (वय २४ वर्ष, रा. सवतगव्हण, माळशिरस) असे अटक केलेल्या आरोपीचे नाव आहे. आरोपीकडून २२ गुन्ह्यांशिवाय इतर १० नवीन गुन्हे ही उघडकीस आले आहेत.
मोटारसायकल चोरीतील आरोपी गोपी चव्हाण हा अकलूज शहरातील वासरू चौकात थांबल्याची माहिती गुन्हे शाखा पथकातील सहाय्यक पोलीस निरीक्षक भिमगोंडा पाटील , सहाय्यक फौजदार प्रकाश कारटकर यांना मिळाली. त्याप्रमाणे पोलिसांनी तात्काळ तेथे जाऊन आरोपीला पकडले. त्याच्याकडे गुन्ह्यांची विचारणा केल्यानंतर सुरूवातीला उडवा उडवीचे उत्तरे दिली. त्यानंतर त्याने आपण साथीदार सोमनाथ दत्तू पवार व करण महादेव चव्हाण (रा. सवतगव्हाण, माळशिरस) यांच्या मदतीने वेळापूर, मोडनिंब, पिराची कुरोली, पंढरपूर, खडकी, बावडा येथून रात्रीच्या वेळी हॅन्डल लॉक केलेल्या दुचाकी चोरून नेल्याचे सांगितले. शिवाय त्याने एक घरफोडी व जबरी चोरी केल्याचे सांगितले. याप्रकरणी पोलिसांनी ८ गुन्ह्यातील २ लाख २७ हजारांचा मुद्देमाल हस्तगत केला आहे.
सदरची कामगिरी स्थानिक गुन्हे शाखेचे वरिष्ठ पोलिस निरीक्षक संजय जगताप यांच्या मार्गदर्शनाखाली विजय शिंदे, भिमगोंडा पाटील, ज्ञानेश्वर वाघ, फौजदार कुलदीप सोनटक्के आणि फौजदार ख्वाजा मुजावर, सायक फौजदार प्रकाश कारटकर, नारायण गोलेकर, धनाजी गाडे, सलीम बागवान , मोहन मनसावाले, विजयकुमार भरले, धनराज गायकवाड, रवि माने, अश्विनी गोटे, प्रमोद शिंपाळे, सागर ढोरे पाटील, समर्थ गाजरे, योगेश जाधव, यश देवकते, मनोज राठोड, अक्षय डोंगरे, अनवर अत्तार, सतीश बुरकूल, आशुतोष जाधव, आदीं पोलीस अमलदारांनी पार पाडली .
