‘ॲनिमल राहत’ टीमकडून प्रथमोपचार; काही काळ वाहतुकीची कोंडी
सोलापूर : पुणे नाका येथील नाल्यावरील पुलावर सोमवारी सकाळी घडलेल्या अनपेक्षित प्रकारामुळे काही काळ परिसरात गोंधळाचे वातावरण निर्माण झाले. पुलावरून तीन उंट जात असताना एका उंटाचा पाय पुलावरील होलमध्ये अडकला. ही घटना सकाळी सुमारे नऊ वाजण्याच्या सुमारास घडली.
उंटाचा पाय होलमध्ये अडकल्याने तो हालचाल करू शकत नव्हता. अचानक घडलेल्या या प्रकारामुळे पुलावर नागरिकांची मोठी गर्दी झाली. त्याचबरोबर काही काळ वाहतुकीची कोंडीही निर्माण झाली. घटनेची माहिती मिळताच स्थानिक नागरिक आणि मदत पथक तातडीने घटनास्थळी दाखल झाले. बराच प्रयत्न करूनही उंटाचा पाय बाहेर न निघाल्याने अखेर क्रेनच्या साह्याने त्याची सुखरूप सुटका करण्यात आली. यावेळी ‘ॲनिमल राहत’ टीमने तत्काळ घटनास्थळी धाव घेत जखमी उंटाच्या पायावर प्रथमोपचार केले. सुदैवाने उंटाला गंभीर दुखापत झाली नसल्याचे सांगण्यात आले.
या घटनेमुळे पुणे नाका पुलाच्या परिसरात काही काळ वाहतुकीचा खोळंबा झाला होता. उंटाची सुखरूप सुटका झाल्यानंतर वाहतूक पुन्हा सुरळीत करण्यात आली.
