२० मेच्या सर्वसाधारण सभेत सदस्य निवडीची शक्यता; इच्छुकांकडून जोरदार लॉबिंग सुरू
सोलापूर : सोलापूर महापालिकेतील गेल्या दोन महिन्यांपासून रखडलेल्या परिवहन समिती सदस्यांच्या निवडीचा तिढा अखेर सुटण्याची चिन्हे निर्माण झाली आहेत. येत्या २० मे रोजी होणाऱ्या महापालिकेच्या सर्वसाधारण सभेत परिवहन समितीच्या सदस्यांची निवड करण्यात येणार असल्याची माहिती समोर आली आहे. पक्षाच्या बैठकीत मोठे फेरबदल करण्याबाबत चर्चा झाली असून अंतिम निर्णय महापौर घेणार असल्याचे सांगितले जात आहे.
परिवहन समितीवर वर्णी लागावी यासाठी विविध पक्षांतील इच्छुकांनी जोरदार लॉबिंग सुरू केले आहे. काही नगरसेवकांनी पक्षश्रेष्ठींकडे फिल्डिंग लावत आपली दावेदारी मजबूत करण्याचे प्रयत्न सुरू केल्याची चर्चा राजकीय वर्तुळात रंगली आहे. समितीत स्थान मिळवण्यासाठी अनेक इच्छुकांकडून पडद्यामागील हालचालींनाही वेग आला आहे. दरम्यान, भाजपकडील स्वीकृत नगरसेवकाचे एक पद अद्याप रिक्त ठेवण्यात आले आहे. या पदावर कोणाची वर्णी लागणार याबाबतही उत्सुकता वाढली असून पक्षासाठी सातत्याने काम केलेल्या एखाद्या निष्ठावान कार्यकर्त्याला संधी मिळण्याची शक्यता व्यक्त केली जात आहे. याबाबतचा अंतिम निर्णयही २० मेच्या सभेत होण्याची शक्यता आहे.
महापालिकेतील आगामी राजकीय समीकरणांच्या दृष्टीने परिवहन समितीची निवड आणि स्वीकृत नगरसेवक पदाची नियुक्ती महत्त्वाची मानली जात आहे. त्यामुळे २० मे रोजीची सर्वसाधारण सभा राजकीयदृष्ट्या विशेष चर्चेची ठरणार असल्याचे बोलले जात आहे.
