सोलापूर : सोलापूर शहरातील श्री मार्कंडेय जलतरण तलावाच्या वाढत्या दुरावस्थेवर अखेर खासदार प्रणिती शिंदे यांनी थेट मैदानात उतरून धडक पाहणी केली. जलतरणपटू, पालक आणि सभासदांनी मांडलेल्या समस्यांची गंभीर दखल घेत त्यांनी तलाव परिसराची प्रत्यक्ष पाहणी करत संबंधित अधिकाऱ्यांना आवश्यक सुधारणा तातडीने करण्याच्या सूचना दिल्या.
तलावातील अस्वच्छ स्वच्छतागृहे, मोडकळीस आलेल्या चेंजिंग रूम, फुटलेल्या टाईल्स, दरवाजेविना बाथरूम, रंगरंगोटीचा अभाव, सोलर सिस्टीमची गरज, पार्किंग परिसराचे काँक्रिटीकरण आणि प्रेक्षक गॅलरीसाठी शेड उभारणी अशा अनेक समस्यांचा पाढाच यावेळी जलतरणपटूंनी खासदारांसमोर वाचला. वाढीव शुल्कामुळे सामान्य कुटुंबातील खेळाडूंना अडचणी येत असल्याचे सांगत पूर्वीप्रमाणे वार्षिक, पंचवार्षिक आणि दशवार्षिक पास योजना पुन्हा सुरू करण्याची जोरदार मागणीही करण्यात आली. उन्हाळी सुट्टीमुळे शिकाऊ विद्यार्थ्यांची संख्या वाढली असून, राज्यस्तरीय स्पर्धांच्या पार्श्वभूमीवर नियमित खेळाडूंना सरावासाठी वेळ आणि सुविधा मिळत नसल्याची खंत पालकांनी व्यक्त केली.
या सर्व समस्या ऐकल्यानंतर खासदार प्रणिती शिंदे यांनी “सोलापूरमधील गुणवंत जलतरणपटूंना दर्जेदार सुविधा मिळाल्याच पाहिजेत,” अशी ठाम भूमिका घेतली.जलतरण तलावातील दुरावस्था दूर करण्यासाठी आवश्यक निधी उपलब्ध करून देण्यात येईल, तसेच शहरातील क्रीडा सुविधा अधिक सक्षम करण्यासाठी विशेष प्रयत्न करण्यात येणार असल्याचे त्यांनी स्पष्ट केले. राज्य, राष्ट्रीय आणि आंतरराष्ट्रीय स्तरावर सोलापूरच्या खेळाडूंना संधी मिळावी, यासाठी आधुनिक सुविधा उभारण्यावर भर देणार असल्याचेही त्यांनी सांगितले. यावेळी महानगरपालिकेचे क्रीडा विभागाचे अधिकारी, जलतरणपटू, प्रशिक्षक, पालक आणि सभासद मोठ्या संख्येने उपस्थित होते.
