सोलापूर : मराठी साहित्य, संस्कृती आणि उपक्रमशीलतेचा ठसा उमटवणाऱ्या महाराष्ट्र साहित्य परिषद दक्षिण सोलापूर शाखेला यंदाचा राजन लाखे पुरस्कृत कै. बाबुराव लाखे स्मरणार्थ ‘वैशिष्ट्यपूर्ण शाखा’ पुरस्कार जाहीर झाला आहे. पुण्यातील बालगंधर्व रंगमंदिरात पार पडलेल्या भव्य सोहळ्यात ज्येष्ठ सनदी अधिकारी अविनाश धर्माधिकारी यांच्या हस्ते हा सन्मान प्रदान करण्यात आला. यावेळी ज्येष्ठ अभिनेते-दिग्दर्शक ऋषिकेश जोशी, संगीतकार पं. सत्यशील देशपांडे, मसाप पुणेचे अध्यक्ष योगेश सोमण, प्रमुख कार्यवाह स्वाती महाळंक, कोषाध्यक्ष प्रदीप निफाडकर आदी मान्यवर उपस्थित होते. दक्षिण सोलापूर शाखेच्या अध्यक्षा रेणुका महागांवकर, कार्याध्यक्ष प्रशांत बडवे, कार्यवाह जितेश कुलकर्णी आणि कोषाध्यक्ष अमोल धाबळे यांनी पुरस्कार स्वीकारला.
नव्या संकल्पनांमुळे राज्यभर दखल
महाराष्ट्र साहित्य परिषद पुणे ही गेली १२० वर्षे मराठी भाषा, साहित्य आणि संस्कृतीच्या जतनासाठी कार्यरत असलेली आद्य साहित्य संस्था आहे. राज्यासह देश-विदेशात तिच्या शाखांचे जाळे विस्तारले असून सोलापूर जिल्ह्यात सर्वाधिक शाखा कार्यरत आहेत. दक्षिण सोलापूर शाखेने वर्षभर राबवलेल्या नाविन्यपूर्ण साहित्यिक उपक्रमांमुळे निवड समितीने या शाखेची ‘वैशिष्ट्यपूर्ण शाखा’ म्हणून निवड केली. कार्यक्रमांचे नेटके नियोजन, वेळेचे काटेकोर व्यवस्थापन, पारंपरिकतेसोबत आधुनिकतेचा समतोल, नवीन प्रेक्षकांपर्यंत पोहोचण्याचा प्रयत्न आणि उपक्रमांचे नियमित ऑडिट व अहवाल सादरीकरण या बाबींची विशेष दखल घेण्यात आली.
सोलापूरच्या कार्यकर्त्यांचाही गौरव
या सोहळ्यात सोलापूरच्या अश्विनी चव्हाण यांना ‘उत्कृष्ट कार्यकर्ता’ पुरस्काराने गौरवण्यात आले. रोख रक्कम आणि स्मृतिचिन्ह असे पुरस्काराचे स्वरूप होते. या कार्यक्रमासाठी सोलापूरमधून साहित्यप्रेमींनी मोठ्या संख्येने उपस्थिती लावली होती. अविनाश महागांवकर, नगरसेवक सात्विक बडवे, पद्माकर कुलकर्णी, श्रुती वडकबाळकर, अ‍ॅड. जे. जे. कुलकर्णी यांच्यासह राज्यभरातील साहित्यिक आणि पदाधिकारी उपस्थित होते.
