सोलापूर : सोलापूर महानगरपालिकेच्या प्रभाग क्रमांक २२ चे नगरसेवक दत्तात्रय (मामा) मेरेगु नडगिरी (वय ५२) यांचे आज दुपारी चारच्या सुमारास दीर्घ आजाराने दुःखद निधन झाले. त्यांच्या निधनाची बातमी समजताच परिसरात शोककळा पसरली असून राजकीय, सामाजिक आणि नागरिकांमध्ये हळहळ व्यक्त केली जात आहे.दत्तात्रय (मामा) नडगिरी हे शांत, संयमी आणि लोकाभिमुख नेतृत्व म्हणून परिचित होते.
प्रभागातील नागरिकांच्या समस्या सोडविण्यासाठी त्यांनी सातत्याने पाठपुरावा केला होता. पाणीपुरवठा, रस्ते, स्वच्छता तसेच नागरिकांच्या मूलभूत सुविधांसाठी ते नेहमी सक्रिय राहून प्रशासनाशी समन्वय साधत काम करत असल्याने त्यांना नागरिकांचा मोठा पाठिंबा लाभला होता.नुकत्याच पार पडलेल्या महानगरपालिका निवडणुकीत त्यांनी भरघोस मताधिक्याने विजय संपादन करत प्रभाग २२ मधून नगरसेवकपद मिळविले होते. त्यांच्या विजयामागे जनसंपर्क, सर्वसामान्यांशी असलेली जवळीक आणि विकासाभिमुख भूमिका महत्त्वाची मानली जात होती.
नागरिकांच्या सुख-दुःखात सहभागी होणारे लोकप्रतिनिधी म्हणून त्यांची ओळख निर्माण झाली होती.त्यांच्या निधनामुळे राजकीय क्षेत्रासह सामाजिक वर्तुळात मोठी पोकळी निर्माण झाल्याची भावना व्यक्त केली जात आहे. त्यांच्या पश्चात पत्नी, दोन मुली असा परिवार असून अनेक मान्यवर, कार्यकर्ते, मित्रपरिवार तसेच नागरिकांनी त्यांच्या निवासस्थानी धाव घेत श्रद्धांजली अर्पण केली. विविध स्तरांतून शोकसंवेदना व्यक्त करण्यात येत आहेत.
