रिक्त पदभरती, वेतन, बदली आणि पेन्शनसह विविध प्रलंबित मागण्यांबाबत आदर्श शिक्षक समितीची शिक्षणाधिकाऱ्यांशी सविस्तर चर्चा
सोलापूर : जिल्ह्यातील प्राथमिक शिक्षकांच्या विविध प्रलंबित प्रश्नांचा तातडीने निपटारा करण्याच्या मागणीसाठी आदर्श शिक्षक समितीच्या पदाधिकाऱ्यांनी शिक्षणाधिकारी (प्राथमिक) कादर शेख यांची भेट घेऊन सविस्तर चर्चा केली. यावेळी शिक्षकांच्या सेवा, वेतन, पदोन्नती, बदली आणि पेन्शनशी संबंधित अनेक महत्त्वाचे मुद्दे उपस्थित करण्यात आले.
समितीच्या वतीने जिल्हा परिषदेतील विस्तार अधिकारी वर्ग-३, श्रेणी २ व श्रेणी ३, केंद्रप्रमुख तसेच मुख्याध्यापकांची रिक्त पदे आचारसंहिता संपताच तातडीने भरण्याची मागणी करण्यात आली. दीर्घकाळ रिक्त असलेल्या पदांमुळे शैक्षणिक व प्रशासकीय कामकाजावर परिणाम होत असल्याचे समितीने निदर्शनास आणून दिले. जनगणना कार्यासाठी नियुक्त करण्यात आलेल्या शिक्षकांच्या वेतनातून वाहन भत्ता कपात करू नये, अशी ठाम भूमिका यावेळी मांडण्यात आली. तसेच इयत्ता पाचवी व आठवीचे वर्ग जोडण्याबाबतचे प्रलंबित प्रस्ताव त्वरित मंजूर करून संबंधित शाळांना दिलासा द्यावा, अशी मागणी करण्यात आली.
अतिरिक्त समाजशास्त्र शिक्षकांच्या वेतनाचा प्रश्न तातडीने सोडविण्यासह शिक्षक पात्रता परीक्षा (टीईटी) अनिवार्य असताना परीक्षेसाठी स्वतंत्र प्रस्ताव मागविण्याची प्रक्रिया बंद करावी, अशी सूचनाही समितीने केली. अनुसूचित जमाती प्रवर्गातील कर्मचाऱ्यांच्या निवृत्ती प्रकरणांमध्ये पेन्शन मंजुरीसाठी येणारे अडथळे दूर करून प्रकरणे जलदगतीने निकाली काढावीत, अशी मागणी करण्यात आली. दक्षिण सोलापूर तालुका अध्यक्ष रमेश घंटेनवरू यांनी समायोजन झालेल्या शिक्षकांना तत्काळ बदली आदेश देऊन त्यांच्या वेतनाचा प्रश्न मार्गी लावण्याची आवश्यकता व्यक्त केली. शिक्षकांच्या विविध अडचणींबाबत सकारात्मक चर्चा झाल्याचे सांगत, संबंधित विषयांवर शासनाच्या धोरणानुसार आवश्यक कार्यवाही करण्यात येईल, असे आश्वासन शिक्षणाधिकारी कादर शेख यांनी दिल्याची माहिती समितीच्या पदाधिकाऱ्यांनी दिली.
