सलगरवस्तीतील वृक्षतोडीविरोधात पर्यावरणप्रेमी एकवटले; वृक्षसंवर्धनाची घेतली शपथ
सोलापूर, : जागतिक पर्यावरण दिनानिमित्त सलगरवस्ती येथील ५४ मीटर रस्त्यावर अवैधरित्या तोडण्यात आलेल्या ११८ झाडांना भावपूर्ण श्रद्धांजली अर्पण करण्यात आली. शहरातील सर्वात मोठ्या अवैध वृक्षतोडीच्या घटनेविरोधात पर्यावरणप्रेमींनी तीव्र भावना व्यक्त करत वृक्षसंवर्धनाचा निर्धार केला. अवैध वृक्षतोड झालेल्या ठिकाणी गुरुवारी सकाळी ११ वाजता श्रद्धांजली सभेचे आयोजन करण्यात आले होते. यावेळी तोडण्यात आलेल्या झाडांच्या स्मरणार्थ पुष्पचक्र अर्पण करून त्यांना श्रद्धांजली वाहण्यात आली. शहरात भविष्यात अशा प्रकारच्या घटना घडू नयेत, यासाठी नागरिकांनी जागरूक राहण्याचे आवाहनही करण्यात आले.
या कार्यक्रमाला उपमहापौर ज्ञानेश्वरी देवकर, नगरसेवक राजशेखर पाटील, नगरसेवक सत्यजीत वाघमोडे, पर्यावरणप्रेमी महेश देवकर, मनोज देवकर यांच्यासह अनेक नागरिक आणि पर्यावरण कार्यकर्ते उपस्थित होते.
यावेळी उपस्थितांनी वृक्ष हे पर्यावरणाचे फुफ्फुस असून त्यांचे संवर्धन करणे ही प्रत्येक नागरिकाची जबाबदारी असल्याचे सांगितले. वाढते शहरीकरण आणि विकासकामांच्या नावाखाली होणारी वृक्षतोड रोखण्यासाठी कठोर उपाययोजना करण्याची गरज असल्याचे मतही व्यक्त करण्यात आले. कार्यक्रमाच्या शेवटी सर्वांनी वृक्षसंवर्धनाची शपथ घेत पर्यावरण संरक्षणासाठी सक्रिय योगदान देण्याचा संकल्प केला. अवैध वृक्षतोडीच्या घटनांविरोधात नागरिकांनी एकजूट दाखविल्यासच शहराचा हरित वारसा जपला जाऊ शकतो, असा संदेश यावेळी देण्यात आला.
