सोलापूर | सोलापूर-बार्शी महामार्गावरील उत्तर सोलापूर तालुक्यातील कारंबा गावाजवळ सोमवारी सकाळी झालेल्या भीषण अपघातात एका शेतकऱ्याचा जागीच मृत्यू झाला, तर एक जण गंभीर जखमी झाला आहे. या घटनेनंतर संतप्त ग्रामस्थांनी अपघातग्रस्त डंपरला आग लावल्याने परिसरात काही काळ तणावाचे वातावरण निर्माण झाले होते.
घटनास्थळावरून व पोलिसांकडून मिळालेल्या माहितीनुसार, धोंडाप्पा गुराप्पा जोडमुटे (वय ७०) आणि मल्लिनाथ हिप्परगी (वय ६०) हे दोघे ॲक्टिव्हा दुचाकीवरून कारंबा येथून शेताकडे जात होते. सोमवारी सकाळी साडेदहा वाजण्याच्या सुमारास न्यू बंजारा हॉटेलजवळ पाठीमागून भरधाव वेगाने येणाऱ्या विटांनी भरलेल्या डंपरने (क्र. एमएच २० बीई ४२६६) त्यांच्या दुचाकीला जोरदार धडक दिली.
या अपघातात धोंडाप्पा जोडमुटे यांचा जागीच मृत्यू झाला, तर मल्लिनाथ हिप्परगी हे गंभीर जखमी झाले. अपघातानंतर स्थानिक नागरिकांनी तत्काळ मदतीसाठी धाव घेत जखमी हिप्परगी यांना रुग्णवाहिकेतून पुढील उपचारासाठी सोलापुरातील स्वीयल हॉस्पिटलमध्ये दाखल केले. या घटनेची नोंद स्वीयल पोलीस चौकीत करण्यात आली आहे.
संतप्त ग्रामस्थांकडून डंपरला आग
अपघाताची माहिती मिळताच कारंबा परिसरातील ग्रामस्थांनी घटनास्थळी मोठी गर्दी केली. अपघातानंतर डंपर चालक घटनास्थळावरून फरार झाल्याचे सांगितले जात आहे. भरधाव डंपरमुळे झालेल्या या भीषण अपघातामुळे ग्रामस्थांमध्ये तीव्र संतापाची लाट उसळली. संतप्त झालेल्या नागरिकांनी अपघातग्रस्त डंपरला आग लावली. डंपर जळत असताना टायर फुटण्याचे मोठे आवाज परिसरात घुमत होते. या घटनेमुळे काही काळ परिसरात तणावाचे वातावरण निर्माण झाले होते.
