निर्मिती विहारमधील बेकायदा वृक्षतोडीचा प्रयत्न हाणून पाडला; संबंधितांवर कारवाईचे आदेश
सोलापूर | पर्यावरण संवर्धनाच्या दिशेने महत्त्वपूर्ण पाऊल उचलत सोलापूर महानगरपालिकेच्या उपमहापौर ज्ञानेश्वरी देवकर यांच्या तत्पर हस्तक्षेपामुळे निर्मिती विहार परिसरातील महापालिकेच्या खुल्या जागेतील तब्बल २५ कडुलिंब वृक्षांची होणारी कत्तल टळली. बेकायदा वृक्षतोडीचा प्रकार उघडकीस आल्यानंतर महापालिकेच्या अधिकाऱ्यांनी तातडीने धाव घेत कारवाई केली.
स्थानिक नागरिकांनी संशयास्पद वृक्षतोड सुरू असल्याची माहिती उपमहापौर ज्ञानेश्वरी देवकर यांना दिल्यानंतर त्यांनी उद्यान विभाग आणि वृक्ष प्राधिकरणाच्या अधिकाऱ्यांना घटनास्थळी पाठविले. तपासादरम्यान एक कडुलिंब वृक्ष तोडण्यात आल्याचे आढळले, तर आणखी २५ वृक्ष तोडण्याची तयारी सुरू असल्याचे स्पष्ट झाले. कारवाईत वृक्षतोडीसाठी वापरले जाणारे कोयते, मशीन, पेट्रोल, ॲसिडसह अन्य साहित्य जप्त करण्यात आले. विशेष म्हणजे, संबंधितांकडे वृक्षतोडीसाठी महानगरपालिकेची कोणतीही अधिकृत परवानगी नसल्याचे उघड झाले.
या गंभीर प्रकाराची दखल घेत उपमहापौर ज्ञानेश्वरी देवकर यांनी दोषींवर दंडात्मक व कायदेशीर कारवाई करण्याचे आदेश दिले आहेत. शहरात यापूर्वी ११० वृक्षतोडीचे प्रकरण गाजत असताना पुन्हा एकदा बेकायदा वृक्षतोडीचा प्रयत्न उघड झाल्याने खळबळ उडाली आहे.
“शहरातील हरित संपत्तीचे संरक्षण ही सर्वांची सामूहिक जबाबदारी आहे. बेकायदा वृक्षतोड करणाऱ्यांविरुद्ध कोणतीही तडजोड केली जाणार नाही.”
; ज्ञानेश्वरी देवकर, उपमहापौर, सोलापूर महानगरपालिका
