मोहोळ (पापरी) ; नवीन शैक्षणिक वर्षाच्या प्रारंभी विद्यार्थ्यांमध्ये शिक्षणाविषयी गोडी निर्माण करण्याच्या उद्देशाने पीएम श्री जिल्हा परिषद प्राथमिक शाळा, पापरी (ता. मोहोळ) येथे सोमवारी शाळा प्रवेशोत्सव उत्साहपूर्ण वातावरणात साजरा करण्यात आला. जिल्हा परिषद सोलापूरचे मुख्य कार्यकारी अधिकारी कुशल जैन यांच्या प्रमुख उपस्थितीमुळे कार्यक्रमाला विशेष महत्त्व प्राप्त झाले.
यावेळी नवागत विद्यार्थ्यांचे आनंदी वातावरणात स्वागत करण्यात आले. मुख्य कार्यकारी अधिकारी कुशल जैन यांच्या हस्ते विद्यार्थ्यांना गणवेश व पाठ्यपुस्तकांचे वितरण करून त्यांच्या शैक्षणिक प्रवासाची सकारात्मक सुरुवात करण्यात आली. शाळेतील रंगीबेरंगी सजावट, विद्यार्थ्यांचा उत्साह आणि पालकांचा उत्स्फूर्त सहभाग यामुळे परिसर उत्सवमय झाला होता विद्यार्थ्यांशी संवाद साधताना कुशल जैन यांनी नियमित शाळेत उपस्थिती, गुणवत्तापूर्ण शिक्षणाचे महत्त्व आणि सर्वांगीण विकासासाठी आवश्यक विविध उपक्रमांची माहिती दिली. शिक्षण ही केवळ पाठ्यपुस्तकांपुरती मर्यादित प्रक्रिया नसून विद्यार्थ्यांच्या व्यक्तिमत्त्व विकासाची भक्कम पायाभरणी असल्याचे त्यांनी सांगितले.
यावेळी त्यांनी शाळेतील शैक्षणिक व भौतिक सुविधांची पाहणी करून शिक्षकांच्या प्रयत्नांचे कौतुक केले. विद्यार्थ्यांना आनंददायी व प्रेरणादायी वातावरणात शिक्षण मिळावे, यासाठी शासनाच्या विविध योजनांची प्रभावी अंमलबजावणी करण्यावर भर दिला जात असल्याचे त्यांनी नमूद केले. प्रवेशोत्सवाच्या माध्यमातून नवीन विद्यार्थ्यांचे स्वागत करण्याबरोबरच पालकांमध्ये शिक्षणाविषयी जागरूकता निर्माण करण्याचे महत्त्वपूर्ण कार्य पार पडले. ग्रामीण भागातील विद्यार्थ्यांना आधुनिक आणि गुणवत्तापूर्ण शिक्षणाच्या प्रवाहात आणण्यासाठी हा उपक्रम प्रेरणादायी ठरत असल्याची भावना उपस्थितांनी व्यक्त केली.
नव्या शैक्षणिक वर्षाची सुरुवात विद्यार्थ्यांच्या चेहऱ्यावरील आनंद, पालकांचा विश्वास आणि शिक्षण व्यवस्थेच्या बांधिलकीचे प्रतीक ठरल्याचे चित्र पापरी येथे पाहायला मिळाले.
