सोलापूर : शेगावचे आराध्य दैवत संत श्री गजानन महाराज यांची पालखी येत्या १७ जुलै रोजी सोलापूर जिल्ह्यात प्रवेश करणार असून, यंदा सोलापूर शहरात पालखीचा तब्बल तीन दिवस मुक्काम राहणार आहे. या पार्श्वभूमीवर सोलापूरकर आणि गजानन भक्तांमध्ये उत्साहाचे वातावरण निर्माण झाले आहे. नियोजनानुसार, १७ जुलै रोजी तामलवाडी मार्गे प्रवास करत दुपारी सुमारे ४ वाजता पालखी उळे येथे मुक्कामासाठी दाखल होणार आहे. त्यानंतर १८ जुलै रोजी सकाळी ९ वाजता रुपाभवानी मंदिर येथे पालखीचे आगमन होईल. येथे मान्यवरांच्या हस्ते पालखीचे स्वागत करण्यात येणार आहे.
यानंतर सम्राट चौक येथील श्री प्रभाकर महाराज मठात दोन पालख्यांची पारंपरिक व ऐतिहासिक भेट होणार आहे. सायंकाळी पालखी कुचन प्रशाला येथे पोहोचेल. तेथे भाविकांना दर्शनाची सुविधा उपलब्ध करून देण्यात येणार असून पालखीचा मुक्कामही तेथेच राहणार आहे. १९ जुलै रोजी सकाळी ६ वाजता पालखी कुचन प्रशालेतून प्रस्थान करेल. सकाळी ११ वाजता उपलप मंगल कार्यालय येथे पालखीचे आगमन होणार असून, येथे महाप्रसादासह मुक्कामाची व्यवस्था करण्यात आली आहे.
त्यानंतर २० जुलै रोजी सकाळी ७ वाजता पालखी तिहे-जगाव मार्गे पुढील प्रवासाला सुरुवात करेल. २१ जुलै रोजी कामतीमार्गे माचणूर येथे, तर २२ जुलै रोजी ब्रह्मपुरीमार्गे मंगळवेढा येथे पालखीचा मुक्काम राहणार आहे. दरम्यान, २३ जुलै रोजी संत गजानन महाराजांची पालखी मंगळवेढ्यातून पंढरपूरकडे प्रस्थान करेल. २३ ते २८ जुलै या कालावधीत पालखीचा मुक्काम पंढरपूर येथे राहणार असून, या कालावधीत हजारो भाविक दर्शनासाठी उपस्थित राहण्याची अपेक्षा आहे.
