सोलापूर : महाराष्ट्र आणि कर्नाटक सीमेवरील तडवळ रेल्वे स्थानकावर शनिवारी (दि.११) पहाटेच्या सुमारास एक थरारक आणि धक्कादायक घटना घडली. येथे थांबलेल्या यशवंतपूर-बिकानेर एक्स्प्रेसमध्ये (गाडी क्र. १६५८७) अज्ञात दरोडेखोरांच्या टोळीने धुमाकूळ घालत प्रवाशांना लुटले. विरोध करणाऱ्या प्रवाशांवर दगडफेक करत महिलांना मारहाण करण्यात आली, ज्यामुळे रेल्वे प्रवाशांच्या सुरक्षेचा प्रश्न पुन्हा एकदा गंभीर बनला आहे. एक्स्प्रेस शनिवारी पहाटे ३ ते ४ या कालावधीत तांत्रिक कारणास्तव तब्बल ७४ मिनिटे तडवळ स्थानकावर उभी होती. निर्जनतेचा आणि अंधाराचा फायदा घेत ४ ते ६ दरोडेखोरांच्या टोळीने ट्रेनच्या एस-४, एस-६ आणि एस-७ या डब्यांना लक्ष केले. काही चोरांनी खिडकीतून हात घालून प्रवाशांचे मोबाईल आणि बॅगा पळवल्या, तर काहींनी थेट डब्यात घुसून महिलांच्या अंगावरील दागिने आणि रोख रक्कम हिसकावून घेतली.
या लुटीमध्ये एस-७ डब्यातून प्रवास करणारे सोलापूरचे प्रवासी महेश गोपाळ पवार (वय ३४, रा. पूर्व मंगळवार पेठ) यांच्या पत्नीच्या गळ्यातील १ लाख ४३ हजार ५०० रुपये किमतीची ५ तोळ्यांची सोन्याची चेन दरोडेखोरांनी जबरदस्तीने ओढून नेली. याशिवाय इतर तीन प्रवाशांचे मोबाईल फोन आणि नगदी रक्कमही लंपास करण्यात आली आहे. भर पहाटे घडलेल्या या घटनेमुळे प्रवाशांमध्ये प्रचंड घबराट पसरली असून रेल्वे पोलिसांच्या गस्तीवर प्रश्नचिन्ह उपस्थित केले जात आहे.
