सोलापूर : उपमुख्यमंत्री एकनाथ शिंदे यांच्या विशेष निधीतून आणि राज्यसभा खासदार प्रा. डॉ. ज्योती वाघमारे यांच्या सातत्यपूर्ण पाठपुराव्यामुळे सिव्हिल लाईन्स परिसरात बसविण्यात आलेल्या अत्याधुनिक सीसीटीव्ही कॅमेऱ्यांचे लोकार्पण रविवारी दत्त मंदिर परिसरात उत्साहात पार पडले. याच वेळी नुकत्याच राज्यसभा सदस्य म्हणून निवड झालेल्या प्रा. डॉ. ज्योती वाघमारे यांचा परिसरातील विविध गृहनिर्माण सोसायट्यांच्या वतीने भव्य जाहीर नागरी सत्कार करण्यात आला.
कार्यक्रमास शिवसेना जिल्हाप्रमुख तथा नगरसेवक अमोल शिंदे, नगरसेवक प्रियदर्शन साठे, अक्कलकोट पंचायत समिती सदस्या शितल म्हेत्रे, सुमित पाटील, राजू आलुरे, समर्थ मोटे, संजीवनी गायकवाड, दीपक पाटील, अजिंक्य साठे, सचिन माने, राजू माने यांच्यासह यशवंत, रत्नदीप, शास्त्री, नालंदा, आकांक्षा, उज्वला, ज्ञानदीप, सह्याद्री, व्यंकटेश सोसायटी, पोस्टल कॉलनी, कृषी कॉलनी, विश्रामनगर आदी परिसरांतील पदाधिकारी व नागरिक मोठ्या संख्येने उपस्थित होते.यावेळी बोलताना खासदार प्रा. डॉ. ज्योती वाघमारे यांनी सांगितले की, उपमुख्यमंत्री एकनाथ शिंदे यांच्या विकासाभिमुख नेतृत्वामुळे राज्यात पायाभूत सुविधा, नागरिकांची सुरक्षा आणि जनहिताच्या विकासकामांना मोठी चालना मिळत आहे. सिव्हिल लाईन्स परिसरासाठी मंजूर करण्यात आलेली सीसीटीव्ही यंत्रणा नागरिकांच्या सुरक्षिततेसाठी महत्त्वपूर्ण ठरणार आहे.
राज्यसभा सदस्य म्हणून सोलापूरच्या विकासासाठी अधिकाधिक निधी उपलब्ध करून देणे, शिक्षण, आरोग्य, महिला सक्षमीकरण, पायाभूत सुविधा आणि नागरी विकास योजनांचा पाठपुरावा करणे हे आपले प्राधान्य राहील, असेही त्यांनी स्पष्ट केले. उपमुख्यमंत्री एकनाथ शिंदे यांच्या मार्गदर्शनाखाली आगामी काळात सोलापूरमध्ये आणखी अनेक विकासकामे मार्गी लागतील, असा विश्वास त्यांनी व्यक्त केला.सिव्हिल लाईन्स परिसरात दोन शाळा, एक महाविद्यालय आणि २१ गृहनिर्माण सोसायट्या असल्याने सीसीटीव्ही यंत्रणा कार्यान्वित झाल्यानंतर विद्यार्थी, पालक आणि नागरिकांच्या सुरक्षेत मोठी भर पडणार आहे. वाहतूक शिस्त, गुन्हेगारीवर नियंत्रण, सार्वजनिक ठिकाणांवरील देखरेख आणि सुरक्षित वातावरण निर्मितीसाठी हा उपक्रम महत्त्वाचा ठरणार असल्याचे उपस्थितांनी सांगितले.
