सोलापूर : सोलापूर तहसील कार्यालयातील भ्रष्टाचाराचा आणखी एक प्रकार सोमवारी उघडकीस आला. जप्त केलेला मुरूम वाहतूक करणारा ट्रक कोणतीही दंडात्मक कारवाई न करता सोडण्यासाठी तब्बल १ लाख रुपयांची लाच स्वीकारताना मंडल अधिकारी विजयकुमार माने यांना लाचलुचपत प्रतिबंधक विभागाच्या (एसीबी) पथकाने रंगेहात अटक केली. या कारवाईमुळे महसूल विभागात एकच खळबळ उडाली आहे. मिळालेल्या माहितीनुसार, तक्रारदाराचा मुरूम वाहतूक करणारा ट्रक महसूल विभागाने जप्त केला होता.
हा ट्रक सोडण्यासाठी मंडल अधिकारी विजयकुमार माने यांनी तक्रारदाराकडे १ लाख रुपयांची लाच मागितली होती . तक्रारदाराने लाच देण्यास नकार देत एसीबीकडे तक्रार दाखल केली.तक्रारीची पडताळणी केल्यानंतर एसीबीने सापळा रचला. सोमवारी दुपारी सोलापूर उत्तर तहसील कार्यालयात तक्रारदाराकडून लाचेची रक्कम स्वीकारताच एसीबीच्या अधिकाऱ्यांनी विजयकुमार माने यांना रंगेहात पकडले.
त्यानंतर त्यांच्याविरोधात भ्रष्टाचार प्रतिबंधक कायद्यानुसार गुन्हा सदर बाजार पोलीस ठाण्यात गुन्हा नोंदविण्याची प्रक्रिया सुरू करण्यात आली.या कारवाईनंतर तहसील कार्यालयात काही काळ गोंधळाचे वातावरण निर्माण झाले. महसूल विभागातील भ्रष्टाचार पुन्हा एकदा समोर आल्याने नागरिकांकडून तीव्र नाराजी व्यक्त होत असून, या प्रकरणाचा पुढील तपास एसीबीकडून सुरू आहे. अशी माहिती पोलीस उपअधीक्षक प्रशांत चौगुले यांनी दिली आहे..
