मुख्यमंत्र्यांच्या वाढदिवसानिमित्त देवपुष्प फाउंडेशनचा ‘प्रेरणा सप्ताह’

सोलापूर : महाराष्ट्राचे मुख्यमंत्री देवेंद्र फडणवीस यांच्या वाढदिवसानिमित्त देवपुष्प फाउंडेशनच्या वतीने ‘प्रेरणा सप्ताह’ आयोजित करण्यात आला असून, १९ ते २७ जुलै या कालावधीत विविध सामाजिक, शैक्षणिक आणि जनकल्याणकारी उपक्रम राबविण्यात येणार असल्याची माहिती फाउंडेशनचे संस्थापक राहुल काटकर यांनी पत्रकार परिषदेत दिली.

या प्रेरणा सप्ताहांतर्गत चित्रकला स्पर्धा, विद्यार्थ्यांना शालेय साहित्याचे वाटप, वृक्षारोपण, गुणवंत विद्यार्थ्यांचा सत्कार तसेच असंघटित कामगारांसाठी दोन कोटी रुपयांच्या विमा संरक्षणाचा उपक्रम राबविण्यात येणार आहे. याशिवाय बेघर, दिव्यांग आणि गरजू नागरिकांसाठी अन्नदानाचाही कार्यक्रम आयोजित करण्यात आला आहे. मुख्यमंत्री देवेंद्र फडणवीस यांच्या नेतृत्वाखाली महाराष्ट्रात साकारलेल्या विविध पायाभूत सुविधा प्रकल्पांची माहिती, विकासकामांची छायाचित्रे आणि राज्याच्या विकासाचा प्रवास चित्रमय स्वरूपात नागरिकांसमोर मांडण्यात येणार असून, या प्रदर्शनाच्या माध्यमातून शासनाच्या विकासकामांची माहिती सर्वसामान्यांपर्यंत पोहोचविण्याचा प्रयत्न करण्यात येणार आहे.

पत्रकार परिषदेला महेश वाघमारे, रोहित परदेशी, सागर गवळी, विवेक भोसले यांच्यासह फाउंडेशनचे पदाधिकारी उपस्थित होते.