पंढरपूर, दि. २४ : आषाढी वारीसाठी लाखो वारकरी पंढरपुरात दाखल होत असताना त्यांच्या आरोग्याची विशेष काळजी घेण्यासाठी आयुष मंत्रालयाने यंदा प्रथमच व्यापक स्वरूपात ‘आयुष सेवा सुविधा केंद्र’ सुरू केले आहेत. केंद्रीय आयुषमंत्री (स्वतंत्र प्रभार) तथा आरोग्य व कुटुंब कल्याण राज्यमंत्री प्रतापराव जाधव यांच्या संकल्पनेतून साकारलेल्या या उपक्रमामुळे वारकऱ्यांना आयुर्वेद, होमिओपॅथी, योग आणि पारंपरिक भारतीय उपचार पद्धतींचा मोफत लाभ मिळणार आहे. राष्ट्रीय आयुष अभियानांतर्गत २४ ते २६ जुलै या कालावधीत पंढरपुरातील तीन रस्ता महाआरोग्य शिबिर, चंद्रभागा वाळवंट आरोग्य केंद्र आणि ६५ एकर आरोग्य केंद्र येथे सेवा सुविधा केंद्र सुरू करण्यात आली आहेत. येथे आयुर्वेदिक व होमिओपॅथी औषधांचे मोफत वाटप, योगविषयक मार्गदर्शन, स्नेहन-स्वेदन, तेल मालिश, विद्धकर्म, अग्निकर्म, चरणसेवा तसेच आयुषविषयक जनजागृती प्रदर्शनाची व्यवस्था करण्यात आली आहे.
या उपक्रमासाठी आयुष विभागातील वैद्यकीय अधिकारी, सोलापूर जिल्ह्यातील २८ आयुर्वेद व होमिओपॅथी महाविद्यालयांतील डॉक्टर, प्राध्यापक आणि इंटर्न्स यांची नियुक्ती करण्यात आली असून वारकऱ्यांना दर्जेदार आरोग्य सेवा देण्यासाठी ते कार्यरत राहणार आहेत. नेचरफिट संस्थेच्या माध्यमातून औषधांचे वितरणही करण्यात येणार आहे. दरम्यान, सेवा केंद्रांच्या तयारीचा आढावा घेण्यासाठी ग्रामीण रुग्णालयात आरोग्य विभागाचे उपसंचालक डॉ. भगवान पवार यांच्या उपस्थितीत बैठक घेण्यात आली. यावेळी आयुष मंत्रालयाचे नोडल अधिकारी, जिल्हा शल्यचिकित्सक, जिल्हा आरोग्य अधिकारी आणि आयुष विभागातील अधिकाऱ्यांनी सेवा सुविधा केंद्रांची पाहणी करून आवश्यक नियोजनाचा आढावा घेतला.
आषाढी वारीदरम्यान वारकऱ्यांना आधुनिक आरोग्य सुविधांसोबतच भारतीय पारंपरिक उपचार पद्धतींचा लाभ उपलब्ध करून देण्याच्या उद्देशाने हा उपक्रम राबविण्यात येत असून, त्याला वारकऱ्यांकडून चांगला प्रतिसाद मिळण्याची अपेक्षा व्यक्त करण्यात येत आहे. पंढरपूर येथील ग्रामीण रुग्णालयात आरोग्य विभागाचे उपसंचालक डॉ. भगवान पवार, आयुष मंत्रालयातर्फे नियुक्त नोडल अधिकारी चंद्रकांत काटकर, युवराज वाघ, जिल्हा शल्य चिकित्सक डॉ. वर्षा डोईफोडे, जिल्हा आरोग्य अधिकारी डॉ. सतिश कोपुरवाड, अतिरिक्त जिल्हा आरोग्य अधिकारी डॉ. नंदकिशोर घाडगे, आयुष नोडल अधिकारी डॉ. हर्षल जाधव यांच्या समवेत बैठक झाली. त्यानंतर सेवा सुविधा केंद्रावर जाऊन व्यवस्थेची पाहणी करण्यात आली.
